Противречности околу „подарениот“ авион: Трамп и Катар во фокусот на нова контроверзија
Администрацијата на Доналд Трамп била таа што прва го контактирала Катар за можноста да набави авион Боинг 747 како привремена замена за „Ер Форс Уан“, откриваат четири извори за Си-Ен-Ен. Ова е во спротивност со тврдењата на Трамп дека Катар сам го понудил авионот како „подарок“.
По преземањето на функцијата во јануари, Трамп наложил итна замена за претседателскиот авион, бидејќи „Боинг“ соопштил дека новите летала нема да бидат готови најмалку уште две години. Поради тоа, Воздухопловните сили, по налог на Трамп и неговиот пратеник Стив Виткоф, почнале да бараат алтернативи, вклучително и преку список на клиенти на „Боинг“, каде што се најде и Катар.
Извори велат дека Катар бил контактиран од страна на Пентагон и покажал подготвеност за продажба. Првично било разговарано за наем, но потоа се разгледувала и можноста за купување. Сепак, Трамп тврдеше дека авионот бил „гест“ од катарското кралско семејство и дека подоцна ќе биде дониран на неговата претседателска библиотека.
Овие информации предизвикаа политичка бура. Демократите и дел од републиканците го доведоа во прашање етичкиот аспект на договорот, а некои дури се заканија со блокада на продажбата на оружје на Катар.
Во февруари, Трамп лично го разгледувал авионот додека бил паркиран во Флорида. Според неговиот тим, тоа било за да се провери опрема и технологија. Белата куќа и Катар нагласуваат дека, доколку дојде до трансфер, тој ќе биде спроведен преку легален меѓудржавен договор.
Преговорите сè уште траат, велат извори. Адвокати од двете страни работат на деталите, но конечна одлука не е донесена. Вредноста на авионот, според некои проценки, изнесува околу 400 милиони долари, но може да е намалена.
Портпаролката на Белата куќа, Каролин Ливит, изјави дека тоа би била „донација за САД“, во согласност со сите законски и етички норми. Катарскиот премиер, пак, не ја потврди верзијата на Трамп и подвлече дека станува збор за договор меѓу владите, а не за лична понуда.
Технички, трансформацијата на еден користен авион во претседателско летало е сложен и скап процес кој може да потрае до две години. Безбедносните агенции би морале целосно да го преработат авионот за да одговара на строгите стандарди.
Постојаната замена за „Ер Форс Уан“ – два нови Боинг 747-800 – треба да бидат испорачани до 2027 година, што е пет години подоцна од првичниот план, но сепак порано од новата проценка на „Боинг“.
„Не сум среќен што трае толку долго“, изјави Трамп. „Можеби ќе купам половен и ќе го реновирам. Затоа ги разгледуваме сите опции.“
