Тетово, 19 мај – По децении на занемарување и прекумерно бетонирање, Тетово конечно ќе добие нов парк, кој се уредува во близина на Пашината џамија. Градот, кој со години се соочува со сериозен недостиг на зелени површини, ќе добие ново место за рекреација, што според надлежните, ќе биде опремено со урбана опрема и ќе понуди простор за одмор и прошетки.
„Нашиот фокус отсекогаш бил на создавање нови зелени површини. Во тек е уредувањето на нов парк кај Пашината џамија. Просторот е веќе израмнет, шутот е расчистен и очекуваме паркот да биде подготвен за употреба во текот на јуни“, изјави портпаролот на Општина Тетово, Албион Алили.
Иако ова е позитивен чекор, останува фактот дека Тетово и понатаму страда од недостаток на јавни зелени површини. Градежната експанзија во изминатите децении резултираше со бројни станбени згради изградени без паркови, детски катчиња или зелени елементи. Малкуте јавни простори што останаа, или се узурпирани, или се претворени во паркинг места.
Општинските власти велат дека интензивно работат на ослободување и трансформација на ваквите простори. „Некои јавни површини кои беа узурпирани со приватни гаражи и паркинзи, ќе бидат пренаменети во зелени зони. Целта ни е да ги вратиме јавните простори на граѓаните“, додаде Алили.
Во рамки на истата иницијатива, градот работи и на уредување на променадата покрај реката. Таму веќе е поставена урбана опрема и осветлување, но дел од инсталациите се често оштетувани од несовесни граѓани или собирачи на метал, што фрла сенка врз овие напори.
Сепак, локалната самоуправа најавува дека нема да отстапи од намерата да го направи Тетово позелено и попријатно место за живеење.
