Велика Британија денеска објави нов пакет од 100 санкции насочени кон Русија, со кои се опфатени воениот сектор, енергетиката и финансиските институции, објави британскиот министер за надворешни работи, Дејвид Лами.
Во своето обраќање, Лами го нарече рускиот претседател Владимир Путин „воен подбуцнувач“, посочувајќи на последните руски напади ширум Украина.
„Го повикуваме да се согласи на итен, целосен и безусловен прекин на огнот, за да се отвори патот кон праведен и траен мир“, изјави Лами при претставувањето на санкциите.
Кои сектори се таргетирани?
Новите санкции се однесуваат на:
набавка и производство на оружје, вклучително и ракетни системи „Искандер“, кои биле користени при неселективни напади врз Украина;
14 лица од Агенцијата за социјален дизајн (SDA) – организација финансирана од Кремљ, која се занимава со ширење дезинформации. Нејзините раководители веќе беа санкционирани претходно;
46 финансиски институции кои ѝ помагаат на Русија да ги заобиколи меѓународните санкции;
Петербуршката девизна берза и Руската агенција за осигурување на депозити, кои од денеска се вклучени во листата на санкционирани субјекти.
„Флота во сенка“ и ограничување на цената на руската нафта
Санкциите вклучуваат и 18 дополнителни танкери од т.н. „флота во сенка“ – систем на бродови што ѝ овозможуваат на Русија да извезува нафта заобиколувајќи ги западните ограничувања.
На почетокот на месецов, британскиот премиер Кеир Стармер најави уште 110 санкции поврзани со оваа флота, што укажува на интензивирање на економскиот притисок.
Британската влада, исто така, работи на заострување на механизмот за ограничување на цената на руската нафта (Oil Price Cap) – алатка што ѝ забранува на Русија да продава нафта по цена повисока од дозволената доколку се користат услуги од земјите членки на Г7.
Овој механизам е во сила од декември 2022 година и моментално го ограничува извозот на руска нафта на 60 долари по барел, ако транспортот се врши преку компании од Г7. Според најавите, ценовниот праг може дополнително да се намали, со цел уште повеќе да се ограничат руските приходи од извоз на енергенси.
