Свет

Зеленски разговараше со европските лидери: „Само со сила може да се постигне резултат“

Украинскиот претседател Володимир Зеленски денеска оствари телефонски разговори со повеќе европски лидери, при што главни теми беа напорите за воспоставување траен мир во Украина, можната нова рунда преговори и обновата на земјата по завршувањето на војната.

Со германскиот канцелар Фридрих Мерц, Зеленски разговарал за обновата на Украина по војната, како и за координација меѓу меѓународните партнери во правец на постигнување праведен и траен мир.

„Координираме сè – контактите и чекорите – што е можно поблиску. Клучно е да се одржи единството меѓу сите партнери и да се бараат решенија кои навистина можат да го запрат овој воен конфликт со праведен мир“, истакна Зеленски.

Тој додаде дека со Мерц разговарале и за неодамнешниот телефонски разговор што го имал со американскиот претседател Доналд Трамп, пренесува агенцијата Ukrinform.

И финскиот претседател Александер Стуб бил информиран од страна на Зеленски за контактот со Трамп, а разговорот вклучувал и мерки за зголемување на притисокот врз Русија.

„Работиме со нашите партнери за да осигуриме дека притисокот ќе ги принуди Русите да го променат своето однесување. Санкциите играат важна улога и сум благодарен на сите што работат на нивно засилување против оние кои се одговорни за оваа војна“, изјави украинскиот претседател.

Во разговор со италијанската премиерка Џорџа Мелони, Зеленски ги разгледал можните платформи за започнување дијалог со Русија.

„Одличен разговор со премиерката Мелони, како и секогаш со многу добри идеи. Разменивме ставови за вчерашниот разговор со претседателот Трамп и со европските лидери. Италија ги поддржува сите напори за воспоставување праведен мир“, рече Зеленски.

Претседателот на Украина телефонски разговарал и со британскиот премиер Кир Стармер, при што биле разгледани можностите за обезбедување траен мир и прекин на огнот. Зеленски ги поздрави новите санкции што ги воведе Обединетото Кралство против Русија.

„Само силата може да доведе до резултати. Денеска има нова одлука за санкции од Велика Британија, како и од Европската унија. Би било корисно доколку и Соединетите Американски Држави се приклучат со сличен чекор. Европските партнери веќе ги подготвуваат следните потези со цел засилен притисок врз Русија за ставање крај на војната“, изјави тој.

Според Ukrinform, лидерите на двете држави разговарале и за детали од заедничките дипломатски активности, како и за можни состаноци што би можеле да придонесат за трајно примирје и стабилен мир.

Зеленски имал телефонски разговор и со францускиот претседател Емануел Макрон, каде што теми биле воената помош од Франција, заедничката одбранбена соработка и координацијата на односите со САД.

Свет

Русија распореди нуклеарно способна ракета „Орешник“ во Белорусија

Белорускиот претседател Александар Лукашенко соопшти дека новоразвиената руска хиперсонична ракета со нуклеарен капацитет, позната како „Орешник“, е веќе распоредена на територијата на Белорусија и е ставена во борбена готовност.

Во своето годишно обраќање, Лукашенко изјави дека ракетниот систем е присутен во земјата од претходниот ден и дека веќе извршува борбена задача. Станува збор за оружје кое Русија го претстави минатата година, откако беше употребено при напад врз украинскиот град Днипро, што тогаш беше оценето како сериозна ескалација на конфликтот во Украина, кој се приближува кон четвртата година.

Москва уште во 2023 година распореди тактичко нуклеарно оружје во Белорусија и најави дека до крајот на 2025 година може да го стационира и системот „Орешник“. Белорусија, како близок сојузник на Русија, има значајна улога во воената стратегија на Москва, која ја користеше белоруската територија за почетокот на офанзивата против Украина во февруари 2022 година.

Во август, властите во Минск најавија дека ќе се вежба распоредување на ракетите „Орешник“ за време на заедничките воени вежби „Запад-2025“, кои ќе се одржат во близина на источните граници на Европската унија и НАТО.

Свет

Карлсон тврди: Можно е Трамп вечерва да најави воен судир со Венецуела

Американскиот новинар Такер Карлсон изјави дека постои можност американскиот претседател Доналд Трамп вечерва да ѝ објави војна на Венецуела, повикувајќи се на информации добиени од член на американскиот Конгрес.

Во подкастот „Sudging Freedom“, Карлсон рече дека на конгресмени им било соопштено дека војната е „неизбежна“ и дека наводно би можела да биде објавена во вечерашното обраќање на претседателот за состојбата на нацијата, закажано за 21 часот по источно време.

„На членовите на Конгресот вчера им беше кажано дека војната е неизбежна и дека ќе биде објавена вечерва во 9 часот. Кој знае дали тоа навистина ќе се случи. Не знам и не сакам да претерувам со информации кои и самиот ги имам во ограничена мера. Но, еден член на Конгресот ми го кажа ова утрово“, изјави Карлсон.

Во меѓувреме, САД се подготвуваат за обраќањето на претседателот Трамп до нацијата, кое привлекува големо внимание поради шпекулациите за можни крупни надворешнополитички најави.

Свет

Москва најавува тужби против европски банки поради замрзнатите средства

Централната банка на Русија најави дека ќе покрене судски постапки против европски банки во руски арбитражен суд, барајќи надомест за, како што наведува, нелегалното блокирање и обидите за користење на нејзините замрзнати средства.

Во соопштението на регулаторот се истакнува дека Банката на Русија ќе бара обештетување за целосниот износ на замрзнатите средства, како и за изгубениот приход што произлегол од нивното блокирање. Овој чекор, според институцијата, е дел од пошироката стратегија за заштита на нејзините финансиски интереси.

Најголемиот дел од руските средства што се под санкции се наоѓаат на сметките на белгискиот депозитар Euroclear. Според финансиските извештаи, вкупната вредност на средствата на Euroclear Bank на крајот на септември изнесувала 227 милијарди евра, од кои 193 милијарди евра се поврзани со санкционирани руски средства.

Руската централна банка веќе поднела тужба против Euroclear во московскиот арбитражен суд, обвинувајќи ја институцијата за „нелегални дејствија“ и оспорувајќи ги плановите на Европската Унија за користење на замрзнатите руски средства. Во тужбата се бара исплата од 18,1 билиони рубљи, односно околу 192,2 милијарди евра.

Според дипломатски извори во Брисел, околу 18 милијарди евра од замрзнатите средства се чуваат на сметки во неколку француски приватни банки. Дополнителни износи се депонирани и во германски банки, како и на сметки во Шведска, Кипар и Луксембург.

Весникот Фајненшл тајмс, повикувајќи се на неименувани извори, објави дека околу седум милијарди евра од руските средства се наоѓаат и во приватни банки во Белгија.