Македонија

Мицкоски следната недела очекува предлог за нов министер за здравство

Премиерот Христијан Мицкоски очекува во текот на следната недела да има предлог од „Вреди“ за нов министер за здравство откако досегашниот министер Арбен Таравари замина од функцијата по недоразбирањата со партнерите од коалицијата „Вреди“.

– Вчера по одржувањето на владината седница имавме, би рекол, коалициска координација, разговаравме за тоа што не очекува во периодот што е пред нас. Како краен рок го дадовме крајот на оваа недела за да ги дефинираме кадровските решенија и веќе да може понеделник или вторник да ги доставам до пратениците во Собранието, изјави денеска Мицкоски.

Рече дека како претседател на Владата има право да каже „не“ доколку како предлог му биде доставена личност со која не може да соработува.

Посочи дека јавното здравство е еден од неговите врвни приоритети и дека неговиот фокус е насочен кон овој сектор,но дека има многу напластени проблеми што ќе треба да се решаваат.

Како пример ја посочи просторијата на Клиниката за гинекологија и акушерство во која требало да се наоѓаат електроенергетските инсталации за енергетско напојување на објектот, каде состојбата не личела на јавен здравствен објект.

– Се надевам дека ќе можат и граѓаните да видат каква руина е оставена од поранешната Влада, посебно во тој дел којшто може да биде многу опасен за сите. Но тоа е само мал дел. Верувам во начинот на којшто се менаџира јавното здравство, многу работи треба да се корегираат. Свесен сум дека луѓето се нестрпливи, но ние треба да сме трпеливи и да продолжиме да работиме, рече Мицкоски.

Во однос на инвестициите во здравството кажа дека наскоро ќе продолжат изградбите на Клиничкиот центар во Штип, Медицинскиот факултет, Студентскиот дом, болницата во Кичево, Здравствниот дом и реконструкција на Клиничката болница Тетово.

Македонија

Згасна позната телевизија во Македонија – престана да емитува програма

Македонскиот телевизиски етер остана посиромашен за еден канал. Телевизија Сонце, која години наназад емитуваше програма со национална концесија преку кабелските оператори, престана со работа.

Гледачите кои се обидуваат да го најдат каналот сведочат за „црн екран“ или известување дека нема сигнал.

ТВ Сонце беше препознатлива по својата специфична програмска шема, фокусирана на македонската историја, културното наследство и прашањата поврзани со македонската дијаспора. Телевизијата беше основана од бизнисменот Ѓорѓија – Џорџ Атанасоски.

Останува непозната и судбината на вработените во овој медиум.

Македонија

Македонија и Турција ја зајакнуваат соработката во образованието и науката со нов договор

Македонија и Турција отвораат ново поглавје во билатералната соработка во образованието, науката, технологијата и иновациите. Министрите за образование и наука, Весна Јаневска и Јусуф Текин, потпишаа договор со кој се зајакнува партнерството меѓу двете земји и се создава основа за интензивна размена на знаење, искуства и кадар.

Со договорот се предвидува размена на информации и научни публикации во областа на формалното и неформалното образование, како и поттикнување на мобилноста на академици, образовни експерти, наставници и средношколци. Посебен акцент е ставен на средното, особено стручното образование, обуката и квалификациите на наставниот кадар, доживотното учење и реализацијата на заеднички образовни проекти.

Двете држави ќе разменуваат искуства и во примената на нови образовни технологии, како и во подготовката и унапредувањето на наставните планови и програми. Учениците ќе добијат можност да учествуваат на научни и културни натпревари што се организираат во Македонија и Турција, а ќе се поттикнува и развојот на заеднички образовни програми и збратимување на училишта.

Како дел од договорената соработка, во двете земји ќе се воведат изборни предмети „Јазикот и културата на Турците“, односно „Јазикот и културата на Македонците“, а предвидено е и меѓусебно стипендирање на средношколци.

За ефикасна примена на договорот ќе биде формирана заедничка работна група, која ќе го следи и координира спроведувањето на договорените активности.

Македонија

Неработни денови и продолжени викенди во јануари 2026

Празничната атмосфера продолжува и во првиот месец од новата година, а јануари носи неколку неработни денови кои овозможуваат подолг одмор и полесно планирање на работните обврски.

Новата година започнува со 1 јануари, кој е неработен ден и паѓа во четврток. Веќе во петок, на 2 јануари, следи кратко враќање на работа, по што доаѓа викенд пауза. Понеделник, 5 јануари, е работен ден, а потоа следуваат 6 и 7 јануари, кога се празнуваат Бадник и Божиќ, кои се неработни денови. На работа повторно се враќа на 8 јануари.

Јануари не завршува тука со празниците. На 19 јануари, понеделник, се празнува Богојавление – Водици, кој е неработен ден за граѓаните од православна вероисповед.

Дополнително, за припадниците на српската заедница, неработен ден е и 27 јануари, кога се одбележува празникот Свети Сава.

Со ваквиот распоред, јануари нуди неколку можности за продолжени викенди и кратки одмори, што многумина веќе ги користат за планирање на слободното време.