Економија

НОВА 5G МРЕЖА ЌЕ БИДЕ ДОСТАПНА ВО МАКЕДОНИЈА Унгарската 4iG влегува во конкуренција со побрз интернет и со пониски цени

Со појавата на нов оператор на пазарот, се предвидува зголемена конкуренција, што според Пал Заранди од унгарската 4iG групација, е позитивен развој. Тој оценува дека воведувањето на 5G технологијата ќе има клучна улога не само за индивидуалните корисници, туку и за економскиот развој, индустриските процеси, образовниот сектор и поддршката на дигитални стартапи.

Пал Заранди, главен стратешки директор на унгарската 4iG групација, најави дека до крајот на 2026 година македонските граѓани ќе добијат можност за користење нова 5G мрежа. Овој чекор, според него, ќе донесе свежа конкуренција на телекомуникацискиот пазар, ќе ги намали цените и ќе го зајакне дигиталниот екосистем во земјата.

Во интервју за МКД.мк, Заранди истакна дека 4iG преку својата подружница „Оне Македонија Телекомуникации“ веќе доставила писмо со намери до македонските власти, со што започнува процесот на официјален влез на пазарот.

Како што објаснува Заранди, стратегијата на 4iG не е насочена само кон обезбедување телекомуникациски услуги, туку и кон поширока поддршка на националната дигитална трансформација.

– Македонската влада ја дефинираше дигитализацијата како клучна стратешка насока во своите политики. Од трансформација на јавната администрација, преку дигитално образование и здравство, па сè до развој на инфраструктура за поврзување на граѓаните и бизнисите – тоа се цели што се совпаѓаат со нашата визија – истакна Заранди во интервјуто.

Тој додаде дека 4iG гледа вистинска можност да стане партнер во реализацијата на овие цели, особено преку изградба на современа 5G инфраструктура.

Со влезот на нов играч, се очекува интензивирање на конкуренцијата на пазарот, што според Заранди е позитивен тренд. Тој смета дека новата 5G мрежа ќе биде од огромна важност не само за приватните корисници, туку и за економијата, индустријата, образованието и за дигиталните стартапи.

– Кога има здрава конкуренција, сите играчи се трудат повеќе – подобрувајќи ги услугите и намалувајќи ги цените. Тоа директно им користи на граѓаните – вели Заранди.

Во однос на динамиката на процесот, тој вели дека засега се одвива подготвителна фаза, на што претходеа интеракции со Владата и со регулаторното тело.

– Сега, се надеваме дека ќе ја добиеме лиценцата и ќе почнеме со тешкиот дел од работата, воспоставување на операции, поставување базни станици. Се надеваме дека целиот процес ќе тече непречено. Се надеваме дека регулаторната рамка ќе биде многу поддржувачка. Работевме со локални експерти кои многу добро го познаваат пазарот и тие не ни посочија никакви поголеми проблеми, што ни дава оптимизам, но ќе видиме – објасни Заранди.

Економија

Најбарани професии во ЕУ – продажба, маркетинг и производство

Според податоците на Евростат за минатата година, најголема незадоволена побарувачка за работна сила во Европската унија имало во професиите поврзани со продажба, маркетинг и производство. Ова укажува на можни тешкотии за работодавачите при регрутирање на персонал во овие сектори.

Според експерименталната статистика, составена делумно преку податоци од онлајн огласи за работа, највисоки стапки на слободни работни места биле забележани кај работници во производство и помошни канцелариски работници, со стапка од 7,3% секое. Следуваат други работници во продажба со 6,1% и уметнички, културни и кулинарски соработници со 6%.

Дополнително, околу 5,8% од непополнетите позиции се однесувале на работници во транспорт и магацини, 5,7% на менаџери за малопродажба и големопродажба, 5,4% на агенти за бизнис и услуги, 5,2% на оператори на постројки и машини и 5% на инженерски професионалци, со исклучок на електротехничките профили.

Евростат истакнува дека иако здравствените работници и наставниците, како и други занимања во јавниот сектор, исто така може да се соочат со тешкотии при регрутирање, тие поретко се рекламираат онлајн, па затоа во податоците се рангирани пониско. Од друга страна, ИТ професиите може да бидат претставени со поголема застапеност во онлајн огласите за работа.

Економија

Хрватска ги менува правилата за странски работници – еве колку дозволи има за Македонците

Хрватска воведува нови услови за вработување на странски државјани со цел подобра контрола, намалување на нелојалната конкуренција и спречување на нелегалните практики. Измените на Законот за странци воведуваат построги здравствени критериуми и барање за познавање на хрватскиот јазик, информира ХРТ.

Граѓанин на трета земја, како Македонија, за прва дозвола за привремен престој ќе мора да приложи потврда за здравствена состојба и статус на вакцинација, кои не смеат да бидат постари од 90 дена. Исто така, познавањето на хрватскиот јазик се смета за основа за интеграција на странските работници, а државниот секретар Иван Видиш посочи дека и покрај кофинансираното учење јазици од Европскиот социјален фонд, интересот кај работниците е слаб.

Хрватска годинава издаде над 11.000 работни дозволи за граѓани од Македонија. Премиерот Андреј Пленковиќ истакна дека во последните две години се создадени 100.000 нови работни места, а бројот на невработени паднал на 81.000, што го покажува ефектот од активната политика за вработување.

Министерот за труд Марин Пилетиќ додаде дека во земјата моментално има околу 140.000 странски работници, а измените на законот ќе го намалат бројот на нови дозволи, додека ќе се зголеми значењето на оние кои веќе се наоѓаат во Хрватска.

Претседателот на GSV, Иван Мишетиќ, посочи дека во наредните пет години ќе бидат потребни над 100.000 работници од странство поради планираниот раст и пензионирањата, бидејќи домашниот пазар не може да го задоволи овој раст.

Економија

Од вечерва нова цена на дизелот

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 0,60% во однос на одлуката од 18.12.2025 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,631%, кај дизелот за 4,633%, кај екстра лесното масло за 3,987% и кај мазутот зголемувањето е за 0,223%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,1645%.

Од 20.12.2025 година од 00:01 часот максималните цени на нафтените деривати ќе изнесуваат:

– Моторен бензин ЕУРОСУПЕР БС – 95 71,00 (денари/литар);
– Моторен бензин ЕУРОСУПЕР БС – 98 73,00 (денари/литар);
– Дизел гориво ЕУРОДИЗЕЛ БС (Д-Е V) 64,50 (денари/литар);
– Масло за горење Екстра лесно 1 (ЕЛ-1) 65,50 (денари/литар);
– Мазут М-1 НС 32,635 (денари/килограм).

Малопродажната цена на ЕУРОДИЗЕЛ (Д-Е V) се намалува за 2,00 ден/лит. Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на Екстра лесното масло за домаќинство на (ЕЛ-1) и на Мазутот М-1 НС не се менуваат.