Во просториите на Општина Кисела Вода, денес се одржа конструктивна средба помеѓу градоначалникот Орце Ѓорѓиевски и амбасадорот на Француската Република, Н.Е. Кристоф Ле Риголер. Главна тема на разговор беше унапредувањето на досегашната соработка меѓу општината и Франција, како и можностите за нејзино продлабочување преку билатерални проекти и размена на искуства.
Ѓорѓиевски го запозна амбасадорот со бројните иницијативи кои општината ги реализира во последниот период, истакнувајќи ја отвореноста за идни партнерства и соработка. Дополнително, беше презентиран и моделот на функционирање на општините во Македонија преку ЗЕЛС, со посебен фокус на децентрализацијата и зголемувањето на надлежностите на локалната самоуправа.
Амбасадорот Ле Риголер го нагласи значењето на зближувањето на македонските и француските градови преку иницијативи за збратимување и размена на добри практики, додавајќи дека Франција е подготвена да ја поддржи оваа соработка и идните заеднички проекти.
Кисела Вода е општина во забрзан развој, отворена за нови идеи и партнерства, а односите со Франција се сметаат за клучни во носењето нов квалитет во локалното делување. Средбата беше оценета како важен чекор за зајакнување на меѓународната соработка и зближување меѓу двете земји на институционално и општествено ниво.
