Свет

Целосен пресврт: Украина три дена по ред ја напаѓа Русија, сериозни проблеми за Москва

Украинските вооружени сили изведоа најдолг и најинтензивен напад со беспилотни летала врз руски територии, поради што претседателот Владимир Путин го отфрли предлогот за прекин на огнот, објавија украинските медиуми. Нападите започнаа вечерта на 20 мај и траеја речиси непрекинато до утрото на 23 мај.

Според официјалните податоци на руското Министерство за одбрана, единиците за противвоздушна одбрана за овој период соборија вкупно 756 украински беспилотни летала.

„Од 20 часот на 20 мај до 8 часот на 22 мај беа соборени 485 беспилотни летала, од 8 до 20 часот на 22 мај уште 159, а од 20 часот на 22 мај до 7 часот на 23 мај дополнително 112“, соопшти Министерството. Нападите беа извршени во 15 региони на Русија и на Крим, а најголем број беспилотни летала беа соборени над Орелската област (197), Курската област (185) и Московската област (109).

Поради нападите, сообраќајот беше привремено прекинат на аеродромите во регионите Владимир, Калушка, Кострома, Тамбов, Јарослав, Иваново, Самара и во Нижни Новгород, како и на московските аеродроми Внуково, Домодедово, Шереметјево и Жуковски. Поради тоа, стотици летови беа одложени, а патниците чекаа и по речиси цел ден за полетување.

Дополнително, пристапот до мобилен интернет беше ограничен во шест региони: Тула, Липецк, Воронеж, Владимир, Орел и Иваново. Локалните власти ги замолија жителите за разбирање поради непријатностите.

Во текот на масовниот напад, украинските беспилотни летала го погодиле фабриката „БЗПП“ во Орел, која произведува микроелектроника за воени цели, како и фабриката „Енергија“ во Липецк, која произведува батерии за беспилотни летала, ракети и авиони.

Нападите предизвикаа оштетување и на неколку повеќекатници во Тула и во Јелец. Десет лица се здобиле со полесни повреди. Во Курск, едно беспилотно летало удрило во мост на автопат, оштетувајќи го коловозот, додека друго удрило во автомобилот на началникот на областа Беловски, Николај Волобујев, кој бил хоспитализиран со повреди на бутот и раката.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.