Свет

Хилари Клинтон со жестоки критики кон американскиот претседател Трамп

САД – Поранешната кандидатка за претседател на САД и поранешна државна секретарка Хилари Клинтон упати остро предупредување во врска со можната амбиција на Доналд Трамп да се кандидира за трет претседателски мандат, спротивно на Уставот на Соединетите Американски Држави. Таа предупреди дека таков потег би можел да отвори врата и за други поранешни претседатели, алудирајќи на Барак Обама и Бил Клинтон.

Во интервју за американскиот медиум „NBC Meet the Press“, Трамп неодамна ги отфрли гласините дека има намера да се кандидира за трет мандат. Сепак, неговите изјави и реторика оставија простор за сомнежи, што Клинтон го искористи како повод за коментар.

„Слушајте што зборува Трамп – тој секогаш сè ви кажува. Често, кога обвинува некого за нешто, всушност говори за нешто што самиот го направил или планира да го направи“, изјави Клинтон во интервјуто.

Таа истакна дека има пријатели кои веруваат дека за да се разбере ваквото однесување, ќе бидат потребни психолози и психијатри.

„Кога Трамп вели: ‘Има луѓе кои мислат дека тоа е можно’, тој мисли на десничарски тинк-тенкови кои активно работат на сценарија како да го заобиколат Уставот“, додаде Клинтон. Таа, исто така, предупреди дека меѓу поддржувачите на Трамп има и „многу милитантни лица кои веруваат дека тоа треба да се случи – и ако не може легално, тие нема да дозволат тоа да биде пречка“.

Клинтон со доза на иронија и критика кон развојот на политичката сцена во САД рече: „Ако веќе одиме во тој правец и го кршиме Уставот, тогаш зошто да не им понудиме на граѓаните вистински избор – да се кандидираат и Барак и Бил!“

„Целата оваа ситуација е апсурдна, срамно е што воопшто мора да разговараме за тоа, но мораме да се соочиме со реалноста“, заклучи Хилари Клинтон.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.