Основниот кривичен суд Скопје им одреди мерка куќен притвор на поранешните директори на Клиниката за радиологија и онкологија – медицинскиот директор Нино Васев и организацискиот директор Нехат Нухи – во рамки на истрагата за предметот познат во јавноста како „Онкологија“.
Како што информираше Судот, решението било донесено по седница на Кривичниот совет, одржана во присуство на странките, при што се разгледал предлогот на Основното јавно обвинителство Скопје за определување мерки за обезбедување присуство на обвинетите.
„Кривичниот совет донесе решенија со кои против обвинетите Н.В. и Н.Н. се определува мерка куќен притвор, додека остануваат во сила и претходно определените мерки за претпазливост – одземање на патната исправа и забрана за нејзино издавање“, стои во соопштението.
Овие мерки, како што се наведува, се изречени поради постоење опасност од бегство, согласно член 165, став 1, точка 1 од Законот за кривична постапка (ЗКП).
Против одлуката странките имаат право на жалба до Апелациониот суд Скопје.
