Вашингтон – Соединетите Американски Држави ќе воведат санкции кон Судан поради употреба на хемиско оружје во 2024 година, соопшти официјалната веб-страница на американската влада. Одлуката, која денеска е доставена до Конгресот, следи по заклучоците од извештајот за усогласеност со Конвенцијата за забрана на хемиско оружје (CWC), во кој се наведува дека Судан не ги почитува своите меѓународни обврски како членка на конвенцијата.
Според објавените информации, санкциите ќе стапат на сила две недели по нивното официјално објавување во „Федералниот регистар“, што се очекува да се случи на 6 јуни.
Мерките вклучуваат рестрикции за извоз на американски стоки и технологии кон Судан, како и ограничување на пристапот на суданската влада до американски кредитни линии и финансиски институции.
„Ги повикуваме суданските власти веднаш да прекинат со употребата на хемиско оружје и да ги исполнат своите обврски согласно Конвенцијата за забрана на хемиско оружје“, се наведува во соопштението на американската влада.
САД веќе долго време ја следат ситуацијата во Судан, каде што насилствата и внатрешните конфликти ги влошија безбедносните и хуманитарните услови. Со најновите санкции, Вашингтон испраќа јасен сигнал дека употребата на забрането оружје ќе наиде на сериозен одговор од меѓународната заедница.
