Бизарна приказна од фронтот во Донбас: Украински војник опуштено заминал по цигар во куќа полна со руски војници

Украински војник по грешка влегол во руска база – заробен во Новооленовка

Во необичен инцидент на фронтот во источна Украина, еден припадник на украинските вооружени сили по грешка влегол во куќа во село Новооленовка, регионот Доњецк, која била под контрола на руските сили. Веднаш по влегувањето, бил заробен од руски војници, пренесува државната новинска агенција РИА Новости.

Според изјавата на Мурат Гаџикурбанов, припадник на 33. моторизиран стрелачки полк на руската војска, инцидентот се случил доцна навечер, околу 22 или 23 часот, кога украинскиот војник – наоружан со митралез, но без заштитен елек и шлем – влегол во куќа која веќе била под руска контрола.

„Пристигна кај нас сосема смирен, со идентификациски траки на раката, мислејќи дека таму се неговите луѓе. Кога сфати дека влегол меѓу руски војници, беше шокиран. Го заробивме, разговаравме со него – се испостави дека дошол по цигари, мислејќи дека таму се сместени украинските сили,“ изјави Гаџикурбанов.

Куќата во која влегол, според неговите зборови, се наоѓала само 15 метри од позициите на украинските сили.

Во текот на испрашувањето, заробениот украински војник наводно дал информации за локацијата и состојбата на украинските позиции во селото. Тој, како што се тврди, ги молел руските војници да не ги убиваат неговите соборци, уверувајќи ги дека тие се подготвени да се предадат.

„Но, украинските сили се обидоа да пружат отпор и, според наши извори, беа елиминирани,“ додаде Гаџикурбанов.

Овие наводи засега не се независно потврдени од украинска страна, пренесува Еуроњуз.