Спорт

Грчките медиуми за натпреварот Алкалоид-АЕК: „Жолто-црните“ се надеваат на пресврт во Скопје

Грчките спортски медиуми во текстовите за денешниот натпревар, генерално коментираат дека атинските „жолто-црни“ се надеваат на пресврт во Скопје, иако ќе ги очекува исполнета сала, но и дека добро се подготвиле по првиот натпревар и поразот на домашен терен.

Имавме многу добра недела со тренинзите. Со нетрпение очекуваме да дадеме сè од себе, да играме подобро од првиот натпревар. Ќе направиме сè за да го освоиме трофејот, вели ракометарот на АЕК Марио Матиќ во изјава за официјалниот портал на клубот во пресрет на денешниот натпревар против Алкалоид, јави дописничката на МИА од Атина.

За денешното гостување во Скопје, по поразот за грчкиот тим од 25-29 во Атина минатата недела, од АЕК велат дека ракометарите „ќе дадат сè од себе против Алкалоид, во второто финале на ЕХФ Европскиот куп“, но и дека тимот е повикан да ја брка разликата на домашен терен за скопскиот тим“.

– Тимот на Фредерик Бужан соодветно е подготвена за многу голем натпревар, на тежок терен, како што е „Борис Трајковски“, пишува во текстот на сајтот на АЕК.

АЕК ќе биде без португалецот Жилберто Дуарте кој е повреден, додека пак од клубот на социјалните мрежи вчера објавија фотографија со сите ракометари предводени од Французинот Бужан и пораката „Верувајте во тоа“.

„АЕК оди на пресврт во Скопје и освојување на европскиот трофеј“; „АЕК бара изненадување во Скопје и втор Европски Куп на ЕХФ“; „Сè за пресврт и освојување на Еврокупот во Скопје – АЕК вечерва против Алкалоид во второто финале на ЕХФ Купот!“, се дел од насловите во спортските портали.

„Газета.гр“ пишува дека тренерот Бужан, по поразот во Атина „се осврна на многуте грешки што беа направени и кои не треба да се повторат“.

– Пред околу 6.200 гледачи, меѓу нив и навивачи на АЕК, сè е можно доколку грчкиот тим го покаже своето вистинско натпреварувачко лице за да го освои својот втор европски трофеј, по освојувањето на ЕХФ Европскиот куп во 2021 година против шведскиот тим Истадс, пишува порталот.

Дополнително ја пренесува и изјавата на голманот на Алкалоид Галевски, во која вели дека нема да биде лесно бидејќи АЕК е искусна и квалитетна екипа, но порталот коментира дека ни за АЕК задачата „сигурно нема да биде лесна, бидејќи Алкалоид имаат победа во сите пет натпревари на домашен терен во овогодишниот Европски Куп на ЕХФ“.

– Од сезоната 2015-16 и тогашниот ЕХФ Челинџ Куп, тимот што го освоил првото финале во седум од осум случаи последователно го освоил трофејот, коментира „Газета“.

Спортскиот портал „Еноси“, што е специјализиран за вести поврзани со екипите на АЕК во сите спортови пишува дека победникот на грчкиот куп „е повикан да направи пресврт по поразот од четири гола во првото финале (25-29), и да го подигне вториот европски трофеј во својата историја“.

– Тимот од петокот е во Скопје, а вчера го одржа последниот тренинг во друга сала, а не во онаа на „Алкалоид“, во која немаше слободни термини за АЕК. „Жолто-црниот“ тим, сепак, има голема верба и сигурност во своите капацитети и знае дека со добар настап, ништо не е невозможно. Дејвис и Арабаѕис се регуларно во тимот, додека повредениот Дуарте остана во Атина, пишува „Еноси“.

Порталот „Спорт фм“ коментира дека „АЕК сака да направи голем comeback во Северна Македонија и да го подигне Европскиот куп на ЕХФ по втор пат“, но и дека тимот е подготвен „да направи голем пресврт против Алкалоид“.

Спорт

Хамилтон се фрли во инженерските води, завршува со Ферари

Покрај тоа што Формула 1 сезоната официјално заврши, Маранело не е толку мирно колку што изгледа на прв поглед. По разочарувачката 2025 година, сè почесто се отвора едно клучно прашање: во кој правец всушност се движи италијанскиот гигант Ферари? Во оваа дебата, својот глас го даде и поранешниот шеф на тимот, Маурицио Аривабене, кој со отворени и директни зборови ги откри некои од најконтроверзните моменти и одлуки во Ферари, фрлајќи ново светло врз иднината на тимот.

Аривабене се осврна на Луис Хамилтон, седумкратниот светски шампион, кој дојде во Ферари пред сезоната 2025 како голем проект за враќање на титулата во Маранело. Но, адаптацијата на Хамилтон се покажа далеку потешка од очекуваното. Возачот не се задржа само на воланот – тој активно се вклучи во сите аспекти на развојот на болидот.

Во текот на сезоната, Хамилтон јавно призна дека ги следи и влијае внатрешните процеси во тимот. Испрати обемни документи до раководството со детали за моторот, аеродинамиката, предната и задната страна на болидот, како и општите проблеми што ги чувствуваше на патеката. Одржа низа состаноци со клучни членови на тимот, вклучително и со Фред Васер и техничкиот оддел, со јасна цел – да го забрза напредокот на тимот.

Но Аривабене предупредува: токму тука лежи потенцијалниот проблем.

Поранешниот шеф на Ферари ја спореди оваа ситуација со периодот кога Себастијан Фетел возеше за тимот (2015-2020). Фетел, исто така, беше активен во техничките дискусии, пишуваше документи и ги споделуваше своите идеи. „Возачот може да дава вредни повратни информации од патеката, но кога почнува да глуми инженер, приказната е практично завршена“, предупреди Аривабене.

Според него, деталниот технички развој мора да остане во рацете на експертите во фабриката. Симулаторот и повратните информации од трките се клучни алатки, но вистинските, длабински технички решенија бараат професионална експертиза која не смее да се меша со возачките амбиции.

Спорт

Навивачите ќе бидат наградени: ФИФА воведува посебни билети за најверните

ФИФА воведе нова категорија билети за Светското првенство 2026, наменета исклучиво за најверните навивачи. Според најавата, околу 10% од вкупниот капацитет на стадионите ќе бидат префрлени од најевтината сегашна категорија („ниво на вредност“) во новата „ниво на влез“.

Билетите во оваа категорија ќе имаат фиксна цена од 60 долари за сите натпревари на сите национални селекции, без разлика на мечот или локацијата. Но, овие билети нема да бидат достапни за слободна продажба преку официјалната ФИФА платформа – наместо тоа, секоја национална асоцијација ќе ги додели на своите најлојални навивачи.

Седиштата за оваа специјална категорија ќе бидат сместени во горниот дел на трибините, што ќе овозможи посебна атмосфера за навивачите кои секогаш ја покажуваат својата верност на тимот.

Спорт

КОНКУРС за идејно решение за изработка на пехар за шампион на Македонија во ПРВА МФЛ

Фудбалската федерација на Македонија распишува конкурс за избор на најдобро идејно решение за новиот пехар наменет за шампионот на Македонија во Првата фудбалска лига.

Целта на конкурсот е да се изработи современо, препознатливо и автентично уметничко решение кое ќе ја симболизира традицијата, енергијата и победничкиот дух на македонскиот фудбал.

Право на учество:

Право на учество имаат: академски уметници, дизајнери, студенти на ликовни академии, архитекти, скулптори и други лица со креативен визуелен израз.

Секој учесник може да конкурира со најмногу три идејни решенија.

Учесниците треба да достават:

Кратко образложение за концептот на пехарот.

Визуелна презентација: скица, 3D рендер, технички цртеж или макета (фотографии).

Предлог материјали, висина и форма на пехарот.

Контакт информации.

Критериуми за избор

Креативност и оригиналност

Препознатлив македонски визуелен идентитет

Функционалност и издржливост