Речиси целото семејство на д-р Алаа Ал-Наџар, педијатарка од болницата „Насер“ во Кхан Јунис, беше убиено во израелски воздушен напад во петокот, соопштија здравствени претставници од Појасот Газа.
Домот на докторката бил погоден додека таа била на работното место, а куќата се запалила. Според изјавата на д-р Ахмад ал-Фара, раководител на педијатрискиот оддел во болницата „Насер“, во нападот загинале девет од нејзините десет деца. Возраста на децата се движела од седум месеци до 12 години. Според Канцеларијата за медиуми на владата во Газа, две од телата сè уште се под урнатините.
Загинатите деца се идентификувани како: Сидар, Лукман, Садин, Ревал, Руслан, Џубран, Ева, Ракан и Јахја.
Сопругот на д-р Ал-Наџар, исто така, бил тешко повреден. Тој се здобил со сериозни повреди на градниот кош и главата, вклучително и фрактура на черепот, и моментално е хоспитализиран на одделот за интензивна нега во истата болница. Единствениот преживеан од децата, 11-годишниот Адам, исто така е сериозно повреден и се наоѓа на интензивна нега заедно со својата мајка.
„Не можете да замислите каков шок доживеа д-р Ал-Наџар кога ја дозна веста. Но сега се обидува да остане покрај својот син и сопруг за да преживее“, изјави д-р ал-Фара за Al Jazeera.
Тој ги повика луѓето ширум светот да „застанат на вистинската страна на човештвото“ и да го кренат гласот против бомбардирањата. „Овие деца немаат глас. Нивната мајка е во шок. Ве молам, бидете нејзин глас“, апелираше тој.
Специјалната известувачка на ОН за палестинските територии, Франческа Албанезе, остро го осуди нападот, нарекувајќи го дел од „садистичкиот образец“ на „нова фаза на геноцид“ со кој се соочува палестинскиот народ во опколената енклава.
Хамас го нарече нападот дел од стратегијата на Израел за „намерно таргетирање на медицински персонал, цивили и нивните семејства, со цел да се скрши нивната волја“.
Израелската армија, пак, изјави дека таргетирала осомничени милитанти кои дејствувале од објект во близина на нивните сили во област од која претходно биле евакуирани цивили. „Наводите за цивилни жртви се во постапка на испитување“, соопшти војската.
Во понеделникот, израелските сили издадоа наредба за присилна евакуација на Кхан Јунис – вториот најголем град во Газа – предупредувајќи на „невиден напад“. Областа веќе е подложена на жестоки и смртоносни бомбардирања.
Децата на семејството Ал-Наџар се меѓу десетиците деца убиени во нападите изминатиот викенд. Според податоците на Министерството за здравство на Газа, телата на 79 загинати во израелските напади биле донесени во болници помеѓу петок и сабота на пладне. Овој број не ги вклучува жртвите од северниот дел на енклавата, каде пристапот до медицински објекти е ограничен.
Од октомври 2023 година, Министерството проценува дека во Газа загинале 53.901 лице, а 122.593 се повредени.
