Трагедија во Колумбија: Автобус полн со студенти излета од мост

ТРАГЕДИЈА ВО КОЛУМБИЈА: Автобус полн со студенти падна од мост – најмалку 10 загинати, повеќе повредени

Најмалку 10 лица загинаа, а седум се повредени во тешка сообраќајна несреќа што се случи во саботата на автопатот Ла Линеа, во близина на градот Каларка, во регионот Киндио, Колумбија. Според информациите од локалната полиција, автобусот, во кој се наоѓале 26 патници – меѓу нив студенти од Универзитетот „Александер фон Хумболт“ и претставници од Националниот институт за патишта – паднал од мост откако возачот изгубил контрола над возилото.

Командантот на полицијата, Луис Фернандо Атуеста, изјави дека првичните информации укажуваат на можно механичко оштетување, по што автобусот удрил во заштитната ограда и излетал од мостот. Остатоците од возилото се расфрлани наоколу, а сцените од местото на несреќата се опишуваат како хорор.

Екипите за итна интервенција брзо реагирале, а повредените веднаш биле пренесени во најблиските болници за укажување на медицинска помош. Во тек е истрага за точните причини за несреќата.

Градоначалникот на Каларка, Себастијан Рамос, упати сочувство до семејствата на настраданите и изрази благодарност до спасувачките служби за нивната навремена и професионална реакција.

Трагедијата предизвика голема тага во локалната заедница, особено меѓу академската јавност и институциите вклучени во несреќата. Властите најавуваат поддршка за погодените семејства и повикуваат на темелна истрага за да се спречат слични трагедии во иднина.