Свет

Европа подготвува сериозен удар за Израел

Европа подготвува нов притисок врз Израел: Спортот не е место за земји што не ги споделуваат европските вредности

Европската Унија разгледува можни санкции против Израел во спортскиот и културниот сектор поради континуираната воена офанзива во Појасот Газа, пренесуваат европски медиуми.

Комесарот за спорт на Европската комисија, Глен Микалеф, во интервју за Политико изјави дека земјите кои не ги споделуваат основните европски вредности не би требало да учествуваат на меѓународни спортски настани. „Спортот е алатка преку која промовираме мир и ги застапуваме човековите права“, рече Микалеф, додавајќи дека спортските организации се автономни, но политичките лидери имаат обврска да го искажат својот став.

Изјавата доаѓа во време на сè поголем притисок врз Израел од страна на европските земји поради влошената хуманитарна ситуација во Газа. Според последните податоци, повеќе од 50.000 Палестинци загинале, а стотици илјади страдаат од глад и болести. Цели градови, како Кан Јунис и Рафах, се претворени во урнатини.

Минатата недела, мнозинството земји-членки на ЕУ дадоа поддршка за ревизија на политичкиот договор со Израел, а неколку израелски амбасадори беа повикани на разговор во престолнините на Франција, Италија и други земји. Причина за дипломатската реакција беше инцидент во кој израелската војска пукала предупредувачки истрели кон европска дипломатска делегација на Западниот Брег.

Микалеф ја осуди, како што ја нарече, „апсолутно шокантната“ состојба во Газа и истакна дека е неопходно вредностите на Унијата да се одразат и преку спортот и културата.

Во контекст на спорните прашања, Микалеф се осврна и на учеството на Израел на овогодинешната Евровизија, кое предизвика бурни реакции. Шпанскиот премиер Педро Санчез побара исклучување на Израел од ваквите настани, посочувајќи дека „не смее да постојат двојни аршини ни во културата“.

Микалеф потврди дека веќе разговарал со Европската радиодифузна унија за овој случај и подвлече: „Овие настани не се само забава, тие се платформи преку кои треба да се застапуваат вредностите на кои се темели Европската Унија“.

За потсетување, по руската инвазија врз Украина во 2022 година, Русија беше моментално суспендирана од сите спортски натпреварувања од страна на МОК и ФИФА, што предизвика повици до меѓународната заедница да реагира со иста мерка и во случајот со Израел.

„Во Газа има крвопролевање, а цената ја плаќаат цивилите. Спортот мора да биде дел од решението, не од молкот“, заклучи Микалеф, кој зборуваше во Европскиот парламент за време на дебата посветена на состојбата во Газа.

Свет

Зеленски во божиќно обраќање: Украина се моли за мир

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, и покрај војната, остануваат обединети во одбраната на својата земја.

Тој нагласи дека Бадниковата вечер е симбол на заедништво и припадност, иако војната се обидува да им го одземе чувството на мир, дом и семејна топлина. Зеленски истакна дека токму тие вредности денес се бранат – земјата, семејствата и правото на живот во мир.

Претседателот призна дека Божиќ доаѓа во исклучително тежок период и дека не сите граѓани вечерва се дома, ниту сите имаат дом. Сепак, подвлече дека Украинците, без разлика дали се во Киев, Одеса, Закарпатија или во близина на фронтот, го одбележуваат празникот заедно, како едно семејство.

Во обраќањето се осврна и на новите масовни руски напади во пресрет на Божиќ, со дронови и ракети, нагласувајќи дека и покрај тоа Украина опстојува.

Зеленски рече дека се моли за украинските војници, за враќање на заробените, за загинатите и за сите протерани, како и за оние кои, и во најтешките околности, не ја изгубиле Украина во себе.

„Се бориме за мир, се молиме за мир и го заслужуваме“, порача Зеленски, честитајќи им Божиќ на граѓаните со зборовите: „Христос се роди! Да го славиме!“.

Свет

Смртоносна експлозија во јужна Москва: Загинаа двајца полицајци и уште едно лице

Двајца сообраќајни полицајци и уште едно лице загинаа во експлозија на автомобил во јужниот дел на Москва, соопшти Истражниот комитет на Русија. Инцидентот се случил рано изутринава на улицата „Елецка“, кога полициските службеници се приближиле до лице кое го сметале за сомнително.

Според официјалните информации, во моментот на интервенцијата била активирана експлозивна направа, по што следела силна детонација. Местото веднаш било обезбедено, а истражните служби започнале со преглед на снимки од надзорните камери и собирање докази.

Снимки прикажани на руските медиуми покажаа оградена зона со засилено полициско присуство, додека сведоци изјавиле дека експлозијата се случила околу 1:30 часот по локално време.

Инцидентот доаѓа само неколку дена по убиството на висок руски воен функционер, генерал-потполковник Фанил Сарваров, кој загина кога бомба експлодираше под неговиот автомобил во друг дел од јужна Москва. Руските истражители тој настан го окарактеризираа како можен атентат.

Руски претставници и воени коментатори веќе повикаа на остра реакција, оценувајќи дека станува збор за трет сериозен бомбашки напад во Москва во изминатата година поврзан со безбедносни цели.

Свет

Проруска хакерска група ја презеде одговорноста за нападот врз Француската пошта

Проруската хакерска група „Нонејм057“ (Noname057) ја презеде одговорноста за кибернападот врз Француската пошта, кој пред два дена го парализираше работењето на централните компјутерски системи. Нападот од типот ДДоС (DDoS) доведе до откажување на сите испораки на пакети и писма, како и прекин на онлајн банкарските плаќања.

Групата „Нонејм057“ е обвинета и за други напади во Европа, меѓу кои и нападот врз Самитот на НАТО во Холандија, кој се одржа во јуни оваа година.

Франција и нејзините европски сојузници го поврзуваат ваквото дејствување со т.н. хибридна војна на Русија, насочена кон создавање поделби во западните општества и поткопување на поддршката за Украина.