Иранскиот претседател Пезешкијан: Ќе опстанеме и без САД
Иран ќе успее да преживее дури и без разговори со САД или со нови санкции, изјави денеска иранскиот претседател Масуд Пезешкијан, пренесуваат иранските медиуми, повикувајќи се на агенцијата „Ројтерс“.
„Нема да умреме од глад ако одбијат да преговараат со нас или ако воведат нови санкции. Ќе најдеме начин да преживееме“, истакна Пезешкијан во своето обраќање.
Изјавата следи по коментарот на американскиот претседател Доналд Трамп, кој минатата недела оцени дека преговорите меѓу Вашингтон и Техеран за иранската нуклеарна програма се движат во позитивна насока и ги нарече „многу добри“.
Претставници на двете земји неодамна одржаа петта рунда преговори. Според американскиот специјален претставник за Блискиот Исток, Стив Виткоф, на последниот состанок бил постигнат одреден напредок.
Иранскиот министер за надворешни работи, Абас Аракчи, изјави дека Иран нема да прифати договор без право на облагородување на ураниумот, но нагласи дека постои простор за напредок во преговорите.
Еден од разгледуваните предлози, според дипломатски извори, предвидува Иран да го прекине облагородувањето на територијата на земјата, но да продолжи со снабдување преку регионален конзорциум во кој би учествувале земји од Блискиот Исток и САД.
Во меѓувреме, иранските власти предупредија дека секоја американска поддршка за израелските воени дејствија би можела сериозно да ги наруши односите меѓу Техеран и Вашингтон, пренесува агенцијата „АП“.
