Воени тензии повторно растат на крајниот север на Европа – регионот каде што Русија се граничи со Финска, Естонија, Латвија и Литванија би можел да стане следното жариште на можен судир меѓу Москва и НАТО.
Руските воени сили во последниве недели повторно се распоредуваат долж границите со Финска и балтичките држави, притоа засилувајќи ја инфраструктурата со нови бази, ровови и утврдувања. Според западни и фински обавештајни извори, Русија враќа хеликоптери и бомбардери во базата Олења, само 150 км од финската граница, додека паравоени формации, вклучително и неонацистичката група „Руси́ч“, се распоредени на северозападните граници.
НАТО државите не останаа неми: Финска веќе изградува одбранбена ограда, а Естонија и Литванија најавија слични мерки. Истовремено, САД и Британија спроведоа заеднички воени вежби со Финска непосредно до руската граница.
Естонија и Финска предупредуваат и на можен „хибриден напад“ со мигрантски бран налик на оној што Белорусија го користи против Полска.
Воени и политички аналитичари стравуваат дека, доколку дојде до замрзнување или прекин на конфликтот во Украина, Русија може да го пренасочи својот фокус токму кон балтичките држави и северна Европа. Според нив, тоа би можело да биде и почеток на директен конфликт меѓу Русија и НАТО.
Дополнителна загриженост предизвикува и руското милитаризирање на Арктикот – регион богат со ресурси и стратешки важен за контрола на новите поморски рути. Таму се сместени дел од најмодерните нуклеарни подморници и ракети со долг дострел.
И додека Москва покажува дека не планира демобилизација на армијата по Украина, американскиот претседател Доналд Трамп изјави дека не гледа закана од руското присуство на северот – став кој предизвика забуна и критики кај европските партнери.
Северот на Европа станува нова стратешка точка на нестабилност, каде секој потег може да има глобални последици.
