Американскиот претседател Доналд Трамп изјави дека примарната цел на неговата царинска политика е зајакнување на домашното производство на воена опрема и висока технологија, а не текстилни производи како патики и маици, пренесуваат светските агенции.
Во изјава дадена за новинарите во Њу Џерси, каде што помина поголем дел од викендот, Трамп го поддржа ставот на министерот за финансии, Скот Бесент, кој неодамна рече дека САД немаат потреба од „претерано развиена текстилна индустрија“. Овој коментар предизвика остра реакција од Националниот совет за текстилна индустрија, кој изрази загриженост поради ваквите изјави и царинските мерки.
„Наша цел не е да произведуваме маици и патики. Ние сакаме да произведуваме воена опрема. Сакам да произведуваме големи нешта — вештачка интелигенција, чипови, компјутери, тенкови и бродови“, изјави Трамп, додавајќи дека САД мора да се фокусираат на стратегиски важни индустрии.
Претставници на текстилната индустрија предупредија дека царинската политика негативно влијае врз нивниот сектор, посочувајќи дека дури 97 проценти од облеката и обувките на американскиот пазар се увезуваат.
Во петокот, Трамп повторно ја засили својата реторика за зголемување на увозните давачки, предлагајќи царини од 50 отсто на стоката од Европската унија, кои требаше да стапат на сила на 1 јуни. Сепак, одлуката беше одложена до 9 јули за да се овозможи продолжување на трговските преговори со Брисел, пренесува агенцијата „Reuters“, а цитира „24Sedam“.
