Сто електрични возила стануваат дел од првиот систем за споделување возила во Скопје, кој ќе започне да функционира од јуни, најави министерот за животна средина и просторно планирање, Изет Меџити. Проектот е дел од амбициозната зелена транзиција и ќе придонесе за намалување на загадувањето и бучавата, како и за поефикасно урбано планирање.
„Едно возило во систем за кар шеринг заменува 10 до 15 приватни автомобили. Тоа значи помал метеж, помалку потреба од паркинг места и почист воздух. Емисиите на овие возила се нула, а бучавата е речиси незабележлива“, изјави Меџити, додавајќи дека ова е прв чекор кон нов, модерен сообраќаен систем во Скопје и другите градови.
Системот, развиен од компанијата Avant2Go Car-Sharing – Македонија, ќе биде достапен преку апликација, а возилата ќе се изнајмуваат по минута или по километар, со цена што започнува од 149 денари.
Министерот потенцираше и на економските предности за граѓаните: „Овој систем ја намалува потребата за купување второ или трето возило во семејството. Тоа е директна заштеда и чекор напред кон попаметна, поеколошка мобилност.“
Проектот, кој започнува со 100 возила, ќе се шири во сите скопски општини, а потоа и во другите градови низ земјата. Целта е во следните две до три години бројот на возила да достигне 1000, што е оптимално за метрополата.
Министерката за енергетика, рударство и минерални суровини, Сања Божиновска, додаде дека се прават напори полначите да користат обновливи извори на енергија, а студентите ќе добијат пристап до возилата преку паркинзи кај универзитетите.
Системот не само што е во согласност со Зелената агенда за Западен Балкан, туку директно ги поддржува обврските на Македонија за климатска транзиција во процесот на евроинтеграции.
