Експлозија во хемиска постројка во Кина: Петмина загинати, шестмина исчезнати
Најмалку пет лица загинаа, а 19 се повредени, додека шест се водат како исчезнати по силна експлозија што се случи околу пладне во хемиска постројка во округот Гаоми, во источната кинеска провинција Шандонг, јавуваат државните медиуми Синхуа и CCTV.
Веднаш по инцидентот, кинеското Министерство за итни ситуации испрати специјализирани тимови, меѓу кои пожарникари, медицински екипи и експерти за индустриска безбедност, за да им помогнат на локалните служби во спасувачките активности, пренесува Синхуа.
На местото на несреќата се ангажирани вкупно 232 пожарникари, а информациите за бројот на загинати и повредени беа објавени неколку часа по експлозијата.
Густ чад сè уште се издига над постројката, која произведува пестициди и хемикалии за медицинска употреба и вработува повеќе од 500 лица, пренесува Асошиетед прес. Засега нема официјални информации за причините за експлозијата, а истрагата е во тек.
