Москва со остри критики до Вашингтон: „Откажете се од милитаризацијата на вселената“
Русија остро ја критикуваше најавата на САД за воспоставување на нов антиракетен систем „Златна купола“, оценувајќи дека проектот го нарушува стратешкиот баланс и стабилност на глобално ниво.
Портпаролката на руското Министерство за надворешни работи, Марија Захарова, на денешната прес-конференција во Москва апелираше до Вашингтон да се откаже од плановите за распоредување оружје во вселената, пренесува државната агенција ТАСС. Според неа, американските намери се закана за меѓународната безбедност и директно нарушување на принципите на мирољубиво користење на вселената.
„Златната купола“, која беше претставена од американскиот претседател Доналд Трамп, се најавува како нова генерација на одбранбен систем со цел справување со напредните ракетни технологии што, според американските воени експерти, ги развиваат земји како Русија и Кина.
Северна Кореја: Потенцијална нуклеарна војна во орбитата
Покрај Русија, и Северна Кореја се приклучи кон меѓународната критика, оценувајќи дека новиот систем претставува „многу опасна закана“ што може да доведе до „нуклеарен судир во вселената“, јави државната новинска агенција КЦНА.
Во официјален меморандум, севернокорејското Министерство за надворешни работи ја осуди намерата на САД за, како што наведуваат, трансформација на вселената во „потенцијална нуклеарна воена зона“.
„Вашингтон покажува решеност за милитаризација на вселената, со што ја загрозува стратешката безбедност на нуклеарните сили ширум светот“, се наведува во документот.
Русија и Северна Кореја побараа меѓународна реакција и спречување на, како што велат, „едностраниот и опасен чекор на САД“ што може да предизвика нова глобална трка во вооружување – овојпат во вселената.
