Северна Кореја остро реагираше на најавениот американски противракетен систем наречен „Златна купола“, оценувајќи дека се работи за исклучително опасна закана која може да доведе до ескалација на конфликт од нуклеарни размери – дури и во вселената. Веста ја пренесе државната новинска агенција KCNA, повикувајќи се на меморандум издаден од Министерството за надворешни работи на Северна Кореја.
Во документот се наведува дека „воведувањето на новиот противракетен одбранбен систем од страна на Соединетите Американски Држави претставува провокативен и заканувачки потег со кој сериозно се нарушува стратешката безбедност на државите кои поседуваат нуклеарно оружје“.
Севернокорејските власти го обвинија Вашингтон дека има намера да ја милитаризира вселената и да ја претвори во можна нуклеарна воена зона, што – според Пјонгјанг – претставува неприфатлив развој на настаните за меѓународната безбедност.
Претседателот на САД, Доналд Трамп, минатата недела официјално го претстави планот за изградба на „Златна купола“, најавувајќи буџет од 175 милијарди долари за негово спроведување. Според Трамп, новиот систем има клучна улога во заштитата и опстанокот на САД во сè понесигурниот глобален безбедносен контекст.
Северна Кореја, која со години е во спор со Вашингтон околу својата нуклеарна програма, овој потег го доживува како дополнително заострување на ситуацијата и можен вовед во трка за вооружување надвор од Земјината орбита.
