Црна Хроника

МАКЕДОНСКИ ДРЖАВЈАНИН УБИЛ 81-ГОДИШЕН МАЖ ВО ГЕРМАНИЈА Уапсен е во Грција, ќе биде екстрадиран

Убиството било извршено на 9 февруари, кога неколку сторители го врзале човекот, му ја затвориле устата и украле пари од неговиот дом, а тој починал од задушување, објавија грчките медиуми.

Во Грција синоќа е уапсен македонски државјанин по кој е распишана европска потерница и кој е баран од германските власти за учество во грабеж и во убиство на 81-годишен маж во февруари годинава во Германија. Тој бил уапсен во обид да влезе во Грција, објавија грчките медиуми.

Според документите од германските власти, станува збор за 34-годишен маж од Македонија, кој заедно со свои сонародници бил на деловно патување во мал град во сојузната покраина Хесен и сите престојувале во една од собите што ги издавал 81-годишниот маж.

Убиството било извршено на 9 февруари, кога сторителите ја врзале жртвата, му ја затвориле устата и украле пари од неговиот дом, а 81-годишникот починал од задушување.

По апсењето, 34-годишниот македонски државјанин ќе биде изведен пред јавен обвинител во Солун, за да започне постапката за негова екстрадиција во Германија.

Црна Хроника

Четири лица приведени во полициска акција на повеќе локации во Скопје

Во текот на ноќта меѓу 24 и 25 декември 2025 година, полициски службеници од СВР Скопје спровеле координирана акција на повеќе локации во главниот град, при што биле лишени од слобода четири лица на возраст од 26 до 47 години.

Од приведените, три лица се од Скопје, додека едно лице е државјанин на Република Турција. При извршените полициски контроли, кај нив биле пронајдени и одземени бела и кафеава прашкаста материја, марихуана, како и таблети.

Од Министерството за внатрешни работи информираат дека по целосното документирање на настаните ќе бидат поднесени соодветни поднесоци против осомничените.

Црна Хроника

Трагедија на Вардар: Извлечено тело на маж од водите на реката

Трагедија ја потресе скопската јавност вчера: во водите на реката Вардар, во близина на селото Трубарево, беше пронајдено тело на машко лице. На местото на настанот се јавиле надлежните околу 14:20 часот, по пријава за пронајдено тело околу 11:00 часот.

Според информациите од полицијата, станува збор за П.С., 71-годишник од Скопје, кој исчезна на 23 декември 2025 година. По извршена проверка и увид на местото на настанот, телото е предадено на обдукција, по наредба на јавен обвинител, за да се утврдат точните причини за смртта.

Случајот ја потсетува јавноста на важноста од внимателно следење на блиските лица и укажува на трагичните последици што може да ги донесе изненадното исчезнување.

Црна Хроника

ВИДЕО: Во раце на полицијата падна голем плен – МВР со детали

Пронајдени се над 25 тони пиротехнички средства во две товарни возила и магацини на правно лице, лишени од слобода се две лица, од кои едното е полициски службеник

На 24.12.2025 во 08:35 часот на наплатна станица Градско, полициски службеници од ОВР Кавадарци во содејство со Единицата за недозволена трговија со оружје, опасни материи и радиоактивен материјал при Одделот за криминалистичка полиција, ги лишија од слобода Н.Р.(41) и И.Р.(41), двајцата од Скопје.

При контрола во товарно возило „пежо боксер“ со струшки регистарски ознаки, кое го управувал Н.Р., а сопатник бил И.Р.-полициски службеник во Полициската станица Бит Пазар, била пронајдена и одземена поголема количина пиротехнички средства за кои не поседувале никаква документација, а за кои изјавиле дека припаѓаат на правно лице од Скопје.
Подоцна, при преземање на дополнителни мерки и активности, пред магацинот на правното лице пронајдено е уште едно товарно возило натоварено со пиротехнички средства, кое било оставено и напуштено.

Додека, пак, денеска со судска наредба извршен е претрес во магацините на правното лице, при што се пронајдени и одземени над 25 тони пиротехнички средства. Единицата за недозволена трговија со оружје, опасни материи и радиоактивен материјал во координација со ОВР Кавадарци ќе ги преземаат сите мерки и активности за утврдување на сите инволвирани лица и по комплетирање на документацијата ќе биде поднесена соодветна пријава по член 396 став 7 од Кривичниот законик.

Видеото може да го погледнете тука