Јажинце, 28 мај 2025 – Денес свечено беше пуштен во употреба системот „One Stop Shop“ на граничниот премин Јажинце-Глобочица, по успешниот пример на истиот систем спроведен на преминот Блаце. Новиот модел овозможува спроведување на заеднички царински и гранични контроли меѓу Северна Македонија и Косово на една локација, со што значително се олеснува движењето и се скратува времето на чекање.
Првиот вицепремиер на Владата на Северна Македонија, Изет Меџити, кој беше присутен на отворањето, ја нагласи стратешката важност на овој проект за регионалната соработка:
„Овој систем е дел од нашата визија за интегриран Балкан, каде што границите не претставуваат пречки, туку мостови за соработка и заеднички напредок.“
Според Меџити, искуството со системот „One Stop Shop“ на Блаце веќе дало конкретни и позитивни резултати – времето на чекање е намалено од неколку часа на само неколку минути. Се очекува истиот ефект да се постигне и во Јажинце, што ќе овозможи поголем проток на патници и стока меѓу двете земји.
„One Stop Shop“ не само што ја подобрува практичната ефикасност на граничните премини, туку придонесува и за јакнење на добрососедските односи и создавање нови услови за економски и регионален развој,“ истакна Меџити.
Проектот се смета за значаен чекор кон поголема безбедност, ефикасност и поинтегриран регион.
