Македонија

Предлогот на „вреди“ Алиу да биде нов министер за здравство прифатлив за премиeрот Мицкоски

Премиерот Христијан Мицкоски „даде зелено светло“ за предлогот на „Вреди“ Азир Алиу да раководи со здравството.

Според Премиерот, Алиу, кој по професија е доктор по информатички науки, ги исполнува условите за да седне во министерската фотеља која остана празна по оставката на Таравари, кога тој реши да ја напушти Владата и да замине во опозиција. Во наредните денови, како што посочи Мицкоски, предлогот ќе биде пуштен до пратениците за да го мине и собранискиот филтер.

-Дали сметате дека господинот Алиу ги исполнува уловите за да биде иден министер за здравство?

Да, јас и официјално го добив тој предлог. Деновиве ќе го доставам до пратениците во Парламентот. Со господинот Алиу се познаваме и мислам дека добро ќе соработуваме во рамките на Владата,- – Христијан Мицкоски – Претседател на Влада.

Додека „црно на бело“ не се потврди неговиот избор, Алиу не сака јавно да коментира за тоа како ќе го спасува најболниот и најсензитивниот сектор. Во телефонски разговор за Канал 5 кусо кажа дека сега е со статус „кандидат“, а доколку стане Министер ќе ги презентира своите планови и програми.

Идниот министер за здравство ќе има полни раце работа, бидејќи здравствениот систем, според поплаките на пациентите, има и површни ама и длабоки „рани“. Освен тоа што во дел од клиниките низ земјава со години нема подобрување на условите, како што е случајот со болницата во Кочани, меѓудругото, пациенти со дијагностициран канцер со месеци чекаат термин за снимања, а кога ќе успеат да направат магнет, некои дури и по половина година чекаат резултатот да им биде прочитан.

Во околу три децении од сите кои раководеле со здравствениот систем, само Никола Тодоров е правник, а Алиу, доколку биде избран, ќе биде вториот кој ќе „министерува“ со здравството, а не доаѓа од лекарската фела.

Инаку, претходно како кадар на Алијансата за Албанците во Владата на СДСМ и ДУИ Алиу беше министер за информатичко општество.

Македонија

Ледени утра ни претстојат: Температурите паѓаат до -8 степени

Македонија денеска е под влијание на влажен бран со облачно време и повремени врнежи од дожд, додека на планините врнежите ќе бидат од снег.

Од петок се очекува стабилизирање на времето, но со значителен пад на утринските температури. За време на викендот и во почетокот на следната недела утрата ќе бидат ведри, но многу студени, со температури кои насекаде ќе се спуштат под нулата.

Најниските утрински температури се предвидуваат во недела и понеделник, кога на места ќе достигнат и до -8 степени. Дневните температури кон крајот на периодот ќе бидат во благ пораст, достигнувајќи до 10 степени.

Македонија

Тошковски сооошти дали ќе има толеранцијата на камерите „Сејф Сити“

Министерот за внатрешни работи, Панче Тошковски, за „Топ Тема“ на Телма изјави дека камерите од системот „Сејф Сити“ ќе имаат исти отстапки како што се применуваат кај полициските радари.

Според министерот, за брзини до 100 км/ч ќе важи толеранција од 6 км/ч, за брзини над 100 км/ч – 8 км/ч, а за брзини над 200 км/ч – 12 км/ч.

Тошковски нагласи дека овие толеранции се однесуваат само на сообраќајни прекршоци, додека во случаи на кривични дела поврзани со сообраќајот, толеранција нема да се применува.

Македонија

Сали и Хоџа нови министри: ВЛЕН најавува засилени реформи и европски курс

Со изборот на Беким Сали за прв вицепремиер и министер за европски прашања и Мухамет Хоџа за министер за животна средина и просторно планирање, коалицијата ВЛЕН јасно го поставува правецот на своето делување – кон реформи, кон Европа и кон држава што работи во интерес на граѓаните.

Именувањето на Беким Сали претставува потврда за политички профил со интегритет, искуство и визија. Како пратеник, Сали важеше за еден од најактивните и најконструктивните гласови во Собранието, со иницирање и поддршка на конкретни законски решенија во интерес на граѓаните и унапредување на институционалните стандарди. Во новата улога како прв вицепремиер и министер за европски прашања, тој ја презема одговорноста за една од стратешките определби на ВЛЕН и на Владата – европскиот пат на државата. Со лидерство, професионалност и решителност, Сали ќе работи на интензивирање на реформите и враќање на довербата дека европската интеграција е реален, мерлив и неповратен процес.

Подеднакво значајно е и именувањето на Мухамет Хоџа на чело на Министерството за животна средина и просторно планирање. Во период кога заштитата на животната средина, уредувањето на урбаниот простор и одржливиот развој се меѓу клучните предизвици, овој ресор бара сериозна работа, стручност и храбри одлуки. Од ВЛЕН истакнуваат дека веруваат оти Хоџа ќе го води секторот одговорно, ставајќи го јавниот интерес пред секоја друга сметка и носејќи политики што ќе ја заштитат животната средина, ќе го уредат просторот и ќе го подобрат квалитетот на живот на граѓаните.

Според ВЛЕН, овие именувања јасно покажуваат дека коалицијата промовира кадри кои работат, а не само зборуваат, кои спроведуваат реформи, а не импровизираат, и кои државата ја гледаат како сервис за граѓаните, а не како партиска сопственост. Со Беким Сали и Мухамет Хоџа на овие клучни позиции, Владата добива нова енергија, јасна европска ориентација и капацитет за конкретни резултати.

Во соопштението, ВЛЕН повторува дека останува посветена на длабоки реформи, европска интеграција и градење институции кои работат со чесност, транспарентност и одговорност.

На крај, од коалицијата изразуваат почит и благодарност до досегашните министри Орхан Муртезани и Изет Меџити за нивниот значаен придонес, одговорното раководење и коректната соработка.