Синоќа на градскиот плоштад во Валандово се одржа музичка вечер во склоп на фолк фестивалот Валандово, на која настапија Каролина Гочева, Тајзи и Ике де Кока. Настанот кој првично требаше да се одржи во саботата, беше поместен за синоќа, поради неповолните временски услови, а како пријатно изненадување за публиката беше појавувањето на сцената на Ана Костадиновска, придружниот вокал на ДНК, која успеа да се спаси во трагичниот пожар во Кочани.
Ова е прво јавно појавување на Костадиновска на сцената по трагедијата од 16-ти март, во која животот го изгубија осум члена од тимот на бендот, односно загинаа 62 младинци. Помеѓу загинатите беше и Сара Пројковска, со која Ана ја делеше сцената околу две децении, и заедно настапуваа како придружни вокали на многу домашни музички ѕвезди, како и на бројни популарни музички настани.
Со својата енергија, талент и професионалност, тие двете секогаш восхитуваа.
Вчерашното враќање на бината, кога пееше придружен вокал на Каролина, јавноста и голем број на нејзини колеги го дочекаа со поддршка и со пораки дека и се восхитуваат на силата која ја собрала во тешките моменти.
-Многу добро ја разбираме и и симнуваме капа на професионалноста. Кога ќе се запалат рефлекторите на бината, и кога сите погледи се вперени во тебе, ти мора да си ја завршиш работата професионално, да си ги оставиш емоциите на страна.
Речиси да нема некој од естрадата кој не доживеал нешто слично, кога му се случувале трагедии и лоши настани, загуби на блиски лица, а едноставно мора да пееш, тоа ти е работа. Познато ми е чувството, јас пеев на закажани настапи во период додека мајка ми ја губеше битката со тешка болест, но и во тие моменти ми кажуваше дека не смеам да откажам настап. Ќе си го стегнеш срцето и ќе си го пуштиш гласот…
Се надеваме дека и Панчо со тек на време ќе најде сили и ќе го продолжи музичкиот пат, ни раскажа наша фолк пејачка, со порака дека цела естрада стои зад Ана и и праќа најдобри желби.
Инаку, Ана целиот живот е со музиката. Ќерка е на легендарниот композитор Кире Костов, кој почина пред две години, а нејзина мајка е професорката по пијано, Кармен Костова.
Токму поради трагедијата, беше одложен априлскиот концерт во чест на нејзиниот татко. Истиот ќе се одржи во НОБ во септември, и ќе настапат познати имиња од домашната музичка сцена.
