Кинеската компанија за е-трговија „PDD Holdings“, сопственик на онлајн платформата Temu, објави во вторникот помал раст на приходите во првиот квартал, во услови на жестока конкуренција на домашниот пазар и трговски ограничувања во странство.
Приходите на матичната компанија на Temu во првите месеци од оваа година изнесуваа 95,67 милијарди јуани (13,30 милијарди долари), што е зголемување од 10 отсто во однос на истиот период минатата година. За споредба, во четвртиот квартал од 2024 година скокнаа за 24 отсто на 110,6 милијарди јуани.
Нето добивката во првиот квартал од оваа година изнесуваше 14,74 милијарди јуани, што е речиси половина од износот од минатата година.
Трговците на мало во Кина ги намалуваат цените, а владата се обидува да го поттикне личното трошење со низа мерки, но граѓаните сè уште се двоумат да купуваат дури и на платформата Pinduoduo на PDD, која ги надмина конкурентите со својот фокус на ниските цени.
Водечките платформи за е-трговија Alibaba, Pinduoduo и JD.com се борат за удел на домашниот пазар, намалувајќи ги цените за да ги охрабрат граѓаните да трошат. Pinduoduo и глобалната платформа Temu имаат предност од широката мрежа на добавувачи на PDD во Кина, забележува Reuters.
Temu, пак, се најде во проблеми откако Вашингтон одлучи да го укине бесцаринскиот увоз на пратки со ниска вредност од Кина и Хонгконг. До неодамна, Американците не плаќаа царини за производи во вредност до 800 долари што ги купуваа во странство. Вашингтон, исто така, ги ослободуваше таквите пратки од стандардните царински процедури.
САД ја воведоа регулативата „de minimis“ уште во 1938 година за да го намалат административниот товар. За време на претседателствувањето на Барак Обама, Конгресот го зголеми плафонот од 200 на 800 долари, а резултатот беше скок на увозот. Во период од десет години, вредноста на увозот на артикли кои, според одредбата „de minimis“, уживаа ослободувања, повеќе од седумкратно, надминувајќи една милијарда долари во фискалната 2023 година, според царинските податоци.
Во меѓувреме, Вашингтон ја намали царината за увоз на пратки со ниска вредност од Кина од 120 на 54 отсто за да ги намали тензиите со Кина и да ги олесни преговорите.
ЕУ моментално ги ослободува од даноци стоките што граѓаните ги купуваат во странство во вредност до 150 евра, но има намера да воведе даноци од 2028 година.
„Нашите трговци се изложени на значителен притисок од радикални промени во надворешното регулаторно опкружување, како што се царините. Нашата глобална компанија работи со трговците на мало во сите региони за да обезбеди стабилни цени и широк спектар на понуди и да го зајакне нашиот бизнис на пазарите што ги опслужуваме“, рече претседателот и ко-извршен директор на PDD, Чен Леи, во разговор со аналитичарите.
Во Temu не сакаaт да ги зголемуваaт цените поради царините и има намера стратешки да го пренасочи својот бизнис за да обезбеди повеќе нарачки за трговците на мало на други пазари, додаде челникот на PDD.
