Прескокнувањето на појадокот носи сериозни здравствени ризици, предупредуваат експертите
Сè поголем број медицински истражувања и стручни мислења укажуваат дека прескокнувањето на појадокот може да има штетни последици за здравјето – како кај децата и тинејџерите, така и кај возрасните лица.
Според дијабетологот и ендокринолог д-р Луиза Напиорковска од Полска, откажувањето од првиот дневен оброк доведува до метаболички пореметувања кои се поврзуваат со зголемено таложење масно ткиво, особено во пределот на стомакот. Таа објаснува дека во отсуство на појадок, телото почнува да работи во режим на „штедење“, складирајќи енергија наместо да ја троши, што директно придонесува кон зголемување на телесната тежина.
– Прескокнувањето на оброци води до хормонални нарушувања, вклучително и зголемено лачење на инсулин, кое со тек на време го намалува одговорот на телото на овој хормон – состојба позната како инсулинска резистенција. Тоа не само што ја поттикнува дебелината, туку и го зголемува ризикот од развој на дијабетес тип 2 – предупредува д-р Напиорковска.
Овој став го потврдуваат и резултатите од истражување објавено во реномираното научно списание „Diabetes Care“, според кое пациентите со дијабетес тип 2 кои редовно го прескокнуваат појадокот се соочуваат со значителни варијации во нивото на шеќер во крвта во текот на денот – што може да биде сериозна закана за нивното здравје.
Професорката Данијела Јакубовиќ од Универзитетот во Тел Авив додава дека прескокнувањето на првиот оброк негативно влијае врз функцијата на бета-клетките во панкреасот, што резултира со зголемени нивоа на гликоза во крвта.
Од сличен агол зборува и д-р Дејвид Катлер за платформата „Healthline“, потенцирајќи дека после подолг период на глад, телото има тенденција да бара прекумерен внес на храна.
– Затоа е неопходно свесно и контролирано да се пристапи кон исхраната. Внесувањето на барем пет порции овошје и зеленчук дневно обезбедува доволна количина витамини и минерали потребни за здраво функционирање на организмот – советува д-р Катлер.
Иако модерниот начин на живот често го потиснува појадокот на маргините, експертите се едногласни: првиот оброк во денот е од клучно значење за правилната регулација на метаболизмот, енергијата и општото здравје. Прескокнувањето на појадокот не само што го нарушува физичкото и менталното функционирање, туку долгорочно може да предизвика сериозни хронични заболувања.
