Грција воведува построги сообраќајни казни: 2.000 евра за мобилен телефон, до 8.000 евра за брзо возење
Грчките власти најавија сериозни измени во Законот за сообраќајна безбедност, со кои се воведуваат значително повисоки казни за прекршителите. Како што изјави алтернативниот министер за транспорт Константинос Киранакис за телевизијата Скај, новиот закон ќе биде доставен до надлежната комисија во грчкиот Парламент уште денес.
Меѓу најзначајните мерки се:
Казни од 350 до 2.000 евра за користење мобилен телефон при возење, дури и ако не се предизвика сообраќајна несреќа. За прво прекршување казната изнесува 350 евра и одземање на возачката дозвола на 30 дена. За второ, казната расте на 1.000 евра и одземање на дозволата за 180 дена, додека третото прекршување носи казна од 2.000 евра и едногодишна забрана за управување со возило.
Истиот режим важи и за неносење заштитна кацига од страна на мотоциклистите и нивните сопатници.
Ограничувањата на брзината се ревидираат:
Во мали и тесни улици во урбани средини ќе се дозволува максимум 30 км/ч
На главните градски патишта – 50 км/ч
На автопатите – ограничувањето ќе се зголеми на 140 км/ч
За возење со брзина над 200 км/ч, како и за учество во илегални улични трки, предвидени се казни од:
2.000 евра (прво прекршување, со одземање на дозволата за една година)
4.000 евра (второ прекршување, со одземање на дозволата за две години)
8.000 евра (трето прекршување, со забрана за возење во траење од четири години)
Во случај на сообраќајна несреќа со тешки телесни повреди, се активира член од Кривичниот законик што предвидува затворска казна до 10 години.
Возење под дејство на алкохол, како и значително пречекорување на дозволената брзина, ќе резултира со отстранување на возилото од страна на сообраќајната служба („пајак“).
Паркирање на места резервирани за лица со попреченост ќе се казнува со одземање на регистарските таблички.
На велосипедистите ќе им биде забрането движење по улиците, со цел зголемена безбедност.
Министерот Киранакис подвлече дека главна цел на овие измени е спречување на „антисоцијалното возачко однесување“, особено во ноќните часови за време на викендите, кога се случуваат најголем број фатални несреќи.
Според официјалната статистика, половина од загинатите во сообраќајни несреќи се мотоциклисти, најмногу страдаат постари пешаци, а 94 проценти од сообраќајните инциденти ги предизвикуваат мажи.
