Франција со нова мерка против пушењето: Забрана на сите јавни отворени простори каде има деца, стапува на сила од 1 јули
Француската влада најави драстични мерки во борбата против пушењето: од 1 јули 2025 година, пушењето ќе биде строго забрането на сите јавни отворени простори каде што може да има деца — вклучувајќи плажи, паркови, простори околу училишта, автобуските постојки и спортски објекти.
„Онаму каде што има деца, тутунот мора да исчезне“, изјави министерката за здравство и семејни прашања, Катрин Вотрен, во интервју за регионалниот весник Ouest-France.
Парична казна и акцент на правото на чист воздух
За прекршителите на оваа забрана е предвидена казна од 135 евра, а министерката подвлече дека „слободата на пушачите завршува таму каде што започнува правото на децата да вдишуваат чист воздух“.
Новите правила се однесуваат не само на простори во близина на детски градинки и основни училишта, туку и на средни и високообразовни институции — со цел да се спречи учениците да пушат пред училиштата.
Изземања и нови мерки за електронските цигари
Сепак, забраната нема да се однесува на надворешните градини на кафулињата, ниту пак на употребата на електронски цигари, иако и за нив се најавуваат идни ограничувања.
Министерката Вотрен изрази намера да го намали дозволеното ниво на никотин во електронските цигари и да го ограничи спектарот на достапни вкусови. Според неа, овие мерки ќе бидат дефинирани врз основа на научни и технички препораки и би можеле да стапат на сила до крајот на првата половина од 2026 година.
Цел: генерација без тутун до 2032 година
Овие мерки се дел од поширокиот Национален план за контрола на тутунот 2023–2027, чија крајна цел е создавање на „генерација непушачи“ до 2032 година. Според истражување на Француската лига против рак, 62% од Французите се согласуваат со воведување на поширока забрана за пушење на јавни места.
Пушењето и понатаму претставува сериозен здравствен предизвик во Франција, каде секоја година 75.000 луѓе умираат како последица на болести поврзани со тутунот.
