Во пресрет на Неделата на светите отци од Првиот вселенски собор, денеска на археолошкиот локалитет „Стоби“ ќе биде отслужена Божествена литургија со која ќе чиноначалствува Архиепископот охридски и македонски г.г. Стефан, во сослужение со повеќе архијереи на Македонската православна црква – Охридска архиепископија и бројно свештенство.
МПЦ-ОА упати јавен повик до сите православни верници да се приклучат на литургијата и заеднички да го одбележат големиот јубилеј – 1.700 години од одржувањето на Првиот вселенски собор, што се смета за клучен момент во историјата на христијанството.
Првиот вселенски собор бил одржан во 325 година во Никеја (денешна Турција), под покровителство на римскиот император Константин Велики. На соборот присуствувале 318 епископи од целата христијанска вселена, меѓу кои и тројца од територијата на денешна Македонија: Александар, епископ на Солун; Будиј, епископ на Стоби; и Дакиј, епископ на Скупи.
Од МПЦ-ОА потенцираат дека нивното присуство на Соборот претставува јасен историски доказ за длабоките и организирани црковни корени на христијанството во македонските простори, уште во IV век. Тие потсетуваат дека токму преку вакви настани се потврдува континуитетот и значењето на македонската црковна традиција во поширокиот православен свет.
