Неколку работи кои треба да ги избегнувате доколку имате висок холестерол

Високиот холестерол не се контролира само преку исхраната – четири вечерни навики кои треба да се избегнуваат 

Покаченото ниво на холестерол значително го зголемува ризикот од срцеви заболувања и мозочен удар. Иако здравите утрински навики се важни, нутриционистите предупредуваат дека начинот на кој го завршуваме денот е подеднакво клучен за регулирање на холестеролот.

Експертите издвојуваат четири навики кои треба да се избегнуваат по 17 часот доколку се стремите кон подобро кардиоваскуларно здравје:

1. Грицкање во доцните часови

Грицкањето во доцните часови, особено чипс, слатки и други преработени производи богати со заситени масти и шеќери, придонесува за зголемување на LDL („лошиот“) холестерол. Доколку не се чувствувате навистина гладни, најдобро е да ја прескокнете ужината. Во спротивно, изберете здрави алтернативи – овесни снегулки, јаткасти плодови, овошје или свеж зеленчук.

2. Нередовен и неквалитетен сон

Недостатокот на сон и нередовниот ритам на спиење може да влијаат врз зголемување на LDL и намалување на HDL („добриот“) холестерол. Сонливоста, покрај физичката исцрпеност, го нарушува балансот на хормоните за глад и ситост, што води до полоши избори во исхраната. Стремете се кон најмалку седум часа квалитетен сон секоја ноќ и избегнувајте користење електронски уреди или консумација на тешки оброци непосредно пред спиење.

3. Консумирање алкохол навечер

Алкохолот во вечерните часови не само што го нарушува сонот, туку може да го зголеми нивото на триглицериди и да поттикне нездрави навики во исхраната. Нутриционистите препорачуваат намалување на алкохолот, особено навечер. Наместо тоа, одлучете се за вода со свежо овошје или безалкохолни коктели без додаден шеќер.

4. Оброци богати со масти и шеќери

Консумацијата на тешки и мрсни вечери, како и слатките десерти, доведува до вишок калории и влошување на липидниот профил. Избегнувајте пржена храна, индустриски десерти и преработени јаглехидрати. За вечера, одберете балансирани оброци со растителни влакна, здрави масти и немасни протеини.

Контролата на холестеролот бара континуирана грижа – 24 часа дневно. Вечерните избори, колку и да изгледаат неважни, можат да имаат клучно влијание врз долгорочното здравје. Избегнувањето на овие четири навики е мал чекор со големи придобивки.