Од утре стапува на сила целосна забрана за продажба и бесплатна дистрибуција на електронски цигари за еднократна употреба во Велика Британија – производ популарен особено меѓу младите. Со ова, Британија им се приклучува на Франција и Белгија, каде што ваквата забрана веќе важи.
„Предолго време, електронските цигари за еднократна употреба беа расфрлани по нашите улици и ги закачуваа нашите деца на никотин“, изјави министерката за животна средина Мери Креј по повод Светскиот ден без чад.
Забраната е воведена како одговор на загриженоста за здравјето на младите и негативното влијание врз животната средина. Овие е-цигари со привлечен изглед, сладок вкус и ниска цена, станаа лесно достапни уште од 2021 година.
Прекршувачите на забраната ќе се соочат со казна од 200 фунти, а за повторени прекршоци – и со затвор до две години.
Податоците покажуваат дека до 2024 година, во Велика Британија се фрлале речиси пет милиони „пуфови“ неделно, што значи преку 40 тони литиум годишно – доволно за батерии на 5.000 електрични автомобили. Отфрлените е-цигари, покрај загадувањето, претставуваат и ризик од пожар.
Иако не содржат катран и јаглерод моноксид, е-цигарите имаат никотин, кој предизвикува зависност. Според организацијата „Акција за пушење и здравје“, речиси 11% од возрасните Британци – или 5,6 милиони луѓе – користат е-цигари, а меѓу децата на возраст од 11 до 17 години, корисници се 18% или околу 980.000.
По најавата за забраната, веќе се бележи пад на употребата – кај возрасната група од 18 до 24 години, процентот на корисници е намален од 52% во 2024 година на 40% во 2025 година.
