Младите да најдат работа дома, да се намали иселувањето и да им се помогне на луѓето во социјален ризик да стекнат нови вештини – ова се клучните цели на Оперативниот план за 2025 година, претставен денеска на трибината „Визија за промена“ во Владата на Република Македонија.
На настанот дискутираа министерката за образование и наука Весна Јаневска, заменик-министерот за социјална политика, демографија и млади Ѓоко Велковски и директорот на Агенцијата за вработување Сељатин Бељули.
Јаневска најави дека преку Планот ќе бидат опфатени 600 лица кои ќе добијат можност за доедукација, доквалификација или преквалификација. За таа намена се издвоени 70 милиони денари, а обуките ќе траат три месеци и ќе се реализираат преку Центарот за образование на возрасни. Огласите за обуките ќе бидат објавени наскоро.
„Секој пријавен ќе добива финансиска поддршка од 12.000 денари месечно, додека организациите што ќе ги спроведуваат обуките ќе бидат надоместени со 30.000 денари месечно“, истакна министерката.
Таа посочи дека фокусот е ставен на вклучување на невработените и повозрасните во пазарот на труд, бидејќи недостигот на работна сила е сè поизразен.
„Со голема тага кажувам дека за седум години изгубивме 17.000 ученици и 7.000 студенти. Тоа е алармантно за една мала земја како Македонија“, предупреди Јаневска.
Оперативниот план 2025 е дел од поширока стратегија за задржување на младите и активирање на работоспособното население со цел стабилен и инклузивен пазар на труд.
