Во утринските часови, во градот Коршенбројх, во сојузната покраина Северна Рајна-Вестфалија, се случи тешка авионска несреќа во која загинаа две лица, пренесува германската телевизија Феникс.
Според првичните информации, мал приватен авион се урнал во дворот на станбена зграда, нанесувајќи сериозни оштетувања на фасадата и предизвикувајќи пожар што се проширил и на соседна работилница, која целосно изгорела.
Како што објави весникот Билд, пилотот на леталото пријавил проблем со моторот непосредно пред несреќата. Авионот требало да слета на аеродромот во Менхенгладбах, но не успеал да стигне до пистата. И покрај брзата интервенција на итните служби, пилотот починал на самото место, а со него и уште едно лице, чиј идентитет сè уште не е објавен.
Точните околности и причините за несреќата остануваат непознати. Германските власти отворија истрага за да ги утврдат деталите околу трагичниот инцидент.
На теренот интервенираа бројни противпожарни и спасувачки екипи, полиција и служби за итна медицинска помош, а областа е привремено блокирана за цивилен сообраќај.
