Најмалку 30 лица го загубија животот во североисточниот дел на Индија поради обилните монсунски дождови што предизвикаа поплави и свлечишта во изминатите два дена, соопштија локалните власти.
Според податоците од тамошната Агенција за управување со катастрофи, најтешко погодени се државите Асам и Аруначал Прадеш, каде загинале осум, односно девет лица – главно како последица на свлечишта.
Во соседната држава Мизорам животот го загубиле пет лица, додека во Мегалаја се регистрирани шест жртви. По две загинати лица се пријавени и во државите Нагаланд и Трипура.
Ваквите смртоносни поплави и свлечишта се честа појава во јужна Азија за време на монсунскиот период. Сепак, експертите предупредуваат дека климатските промени значително ја зголемуваат фреквенцијата и интензитетот на овие екстремни временски појави.
Локалните власти продолжуваат со спасувачките операции и проценуваат дополнителни ризици во погодените региони, додека метеоролозите најавуваат нов бран врнежи во наредните денови.
