Премиерот Христијан Мицкоски остро реагираше на најавата дека бугарски европратеник од владејачката партија ГЕРБ ќе поднесе амандман во Европскиот парламент со кој македонскиот идентитет би се дефинирал како „сегашен“, за разлика од формулацијата во извештајот на европратеникот Томас Вајц, кој го признава како „многувековен“.
„Жалам што од нашиот источен сосед повторно гледаме реторика која го враќа духот на живковизмот. Наместо добрососедство, гледаме обиди за негирање и асимилација,“ изјави Мицкоски.
Тој посочи дека Македонија нема да одговори со иста острина, туку ќе остане на европскиот курс и ќе продолжи да ги негува добрососедските односи. Но, истовремено изрази длабока загриженост од, како што рече, политиките што директно удираат по македонскиот идентитет и јазик.
„Обидот да се наметне терминот ‘present’ за македонскиот идентитет јасно покажува дека суштината е асимилација, а не почитување на европските вредности. Истото го гледавме и во бугарските пописи – од 200 илјади Македонци во 1956-та, до само 9 илјади во 1965-та,“ потенцираше премиерот.
Во контекст на европската перспектива на земјава, претседателот на СДСМ Венко Филипче од младинска трибина во Струмица порача дека иднината на Македонија е во Европа. Според него, токму европскиот пат е гаранција за зачувување и признание на македонскиот идентитет.
„Тоа е обединување на сите Македонци, тоа е подобар живот и систем на вредности каде идентитетот е признат, а достоинството заштитено,“ изјави Филипче.
Во меѓувреме, бугарските пратеници со 194 гласа „за“ ја изгласаа резолуцијата со која се поддржуваат евроинтеграциите на Македонија, но со јасна порака дека нема алтернатива доколку не се почитува Договорот за добрососедство.
Во среда, известителот за Македонија, Томас Вајц, ќе го презентира новиот извештај во Европскиот парламент, во кој се потврдува засебниот македонски идентитет и јазик, што се очекува да биде јасен сигнал за европската поддршка на македонската позиција.
