Руски теретен воз, кој се движел кон Крим, бил дигнат во воздух, соопштија украинските власти. Инцидентот се случил по серијата експлозии во пограничните области на Русија, при што имало загинати и повредени.
Според информациите на „Руските железници“, железничката линија на делницата Унеча–Жеча во Брјанската област е оштетена, но среќа во несреќа – нема повредени лица.
„На 10:52 часот, за време на инспекција на инфраструктурата со специјализирана опрема, железничките работници забележале оштетување на пругата. Сообраќајот на патничките и приградските возови на оваа делница е запрен“, објавија „Московските железници“ – подружница на „Руските железници“ – преку својата официјална страница на Телеграм, пренесе Ројтерс.
Истиот ден, украинската воена разузнавачка служба (ГУР) објави дека друг руски теретен воз, кој превезувал гориво, бил цел на експлозија во текот на ноќта во близина на селото Акимовка, во Мелитополскиот округ на Запорошката област. Според ГУР, станува збор за подрачје под руска окупација.
„Возот, кој пренесуваше цистерни со гориво и товарни вагони, излета од шините како резултат на експлозија поставена на пругата. Со тоа е прекината клучната логистичка артерија за руските сили во окупираното Запорожје и на Крим“, се наведува во соопштението на украинската разузнавачка служба.
Засега, руските власти не се имаат официјално изјаснето за нападот во Запорошката област.
