Трамп сподели теорија на заговор дека Бајден е заменет со клонирани двојници
Американскиот претседател Доналд Трамп повторно предизвика контроверзии откако на својот официјален профил на социјалната мрежа Truth Social сподели објава која промовира неоснована теорија на заговор за неговиот политички ривал, Џо Бајден.
Во објавата, која првично потекнува од профил со поддршка за Трамп, се тврди дека „Џо Бајден не постои – тој бил погубен во 2020 година“, а потоа продолжува со шпекулации дека актуелниот Бајден е заменет со „клонирани, роботски создадени суштества без душа и разум“, при што, како што се тврди, „демократите не забележуваат разлика“.
Медиумот Newsweek побара објаснување од Белата куќа околу причината за споделувањето на оваа содржина и дали тоа претставува поддршка за ваквите тврдења. Прашање било упатено и до претседателот Бајден преку неговата агенција Creative Artists Agency.
Ниту еден доказ не постои во прилог на оваа теорија. Џо Бајден редовно се појавува во јавноста, одржува конференции за новинари и остварува директни средби со светски лидери – активности кои не би можеле реално да се фалсификуваат со денешната технологија. За спроведување на ваква масовна измама би било потребно учество на илјадници лица, вклучително и од редовите на републиканците, медиумите и меѓународната заедница – сценарио кое е речиси невозможно.
Здравствената состојба на Бајден – извор на шпекулации
Објавата доаѓа во период кога јавноста е вознемирена поради информацијата дека поранешниот претседател Бајден боледува од агресивен облик на рак на простата. Официјалните извештаи велат дека дијагнозата е со висок степен на малигност и метастази на коските, што предизвика сериозни прашања за транспарентноста во врска со неговото здравје.
Платформата Truth Social дополнително ja вжешти атмосферата со споделување на статија од сатиричниот конзервативен медиум Babylon Bee, со наслов „Семејството на Бајден загрижено дека им снемува време за да го искористат неговото здравје“, која иако е хумористичка, беше поставена во контекст на теориите на заговор.
Само неколку дена по објавата на дијагнозата, Трамп повторно сподели објава во која Бајден се нарекува „мртовец“. Во истата објава, демократите беа обвинети за изборен фалсификат во 2020 година, помилување на свои сојузници и користење на „автоматизиран потпис“ на службени документи – алузија на уште една теорија на заговор според која Бајден не ги потпишувал лично документите.
„Не треба да чувствувате сожалување“
Десничарската коментаторка Лора Лумер на платформата X објави: „Трамп штотуку сподели: ‘Џо Бајден не постои’“, проследено со насмеано емоџи. На заедничка прес-конференција со Илон Маск, Трамп изјави: „Тој не е интелигентен човек, но знае да биде подмолен. Ако чувствувате сожалување кон него – не треба. Тој повреди многу луѓе.“
По објавата за здравствената состојба на Бајден, Американското здружение за борба против рак излезе со официјално соопштение: „Поранешниот претседател Бајден и првата дама Џил Бајден ја имаат нашата целосна поддршка во справувањето со дијагнозата. Бајден со години е лидер во борбата против ракот и се залага за негово искоренување.“
Бајден, пак, во изјава до медиумите рече дека се чувствува добро, третманот веќе е започнат, и тимот на лекари е оптимистички настроен.
