Алијанса за Албанците (АА) жестоко го нападна поранешниот министер за здравство Арбен Таравари, обвинувајќи го за оставени здравствени работници без вработување и за, како што велат, „лични и групни политики“ кои резултирале со институционална неодговорност и деградација на јавниот здравствен систем.
„Неодговорното однесување на Таравари го достигна својот врв. Тој ќе се соочи со судот на граѓаните на двојните избори во октомври, каде што отчетноста нема да изостане“, порачуваат од АА, додавајќи дека состојбата во здравствениот систем е на раб на колапс.
Според партијата, здравствените работници и соработници со право реагираат на повеќегодишното одложување на процесот за нивно вработување. Ваквото однесување, како што истакнуваат, не само што го нарушува моралот и мотивацијата на здравствениот кадар, туку и директно го загрозува функционирањето на системот.
АА остро ја критикува и актуелната коалиција ВЛЕН, оценувајќи дека наместо ветената промена, донела уште поголема правна и професионална несигурност за здравствените работници. Според нив, во сите јавни здравствени установи има медицински соработници без редовен статус, што претставува опасност за целокупниот здравствен систем.
„Почнете од Тетово – таму каде што неправдата има најболна форма. Делувајте сега, пред да биде предоцна“, апелира Алијансата, барајќи итна владина седница со единствена точка на дневен ред: трајно вработување на сите здравствени соработници и среден медицински персонал.
„Ако денес ги игнорираме белите мантили, утре ќе ни недостига самата надеж за функционален здравствен систем“, предупредуваат од АА.
