Кандидатот на десничарската националистичка партија „Право и правда“ (ПиС), Карол Навроцки, победи на претседателските избори во Полска и ќе го преземе претседателскиот мандат, соопшти полската изборна комисија.
Во вториот круг од изборите, Навроцки освои 50,89 проценти од гласовите, додека неговиот противкандидат, проевропскиот и либерален градоначалник на Варшава, Рафал Часковски, доби 49,11 проценти. Првичните проекции веднаш по затворањето на избирачките места му даваа блага предност на Часковски, но конечниот резултат ја потврди победата на Навроцки.
Изборниот резултат се смета за сериозен удар за актуелната влада на премиерот Доналд Туск. Победа на Часковски ќе значеше зајакнување на реформите што Туск ги иницираше, но кои претходно беа блокирани од поранешниот претседател, Анджеј Дуда – исто така од партијата ПиС.
Навроцки, кој е политички новајлија, ја водеше својата кампања под мотото „Полска на прво место“. Во јавноста е познат по тврдиот став кон украинските бегалци, кои, според него, „профитираат од полскиот систем“. Тој отворено се спротивставува на пристапувањето на Украина во НАТО и е деклариран обожавател на поранешниот американски претседател Доналд Трамп.
Претседателските избори се сметаат за пресудни за политичката иднина на Полска. Излезноста на гласачите беше висока – речиси 72 проценти, што претставува зголемување во однос на првиот изборен круг.
