Претседателот на Демократскиот сојуз, Павле Трајанов, денеска до Собранието достави предлог-закон за измени на Изборниот законик, со кој се предлага Македонија да биде една изборна единица.
Според партијата, предложените измени ќе придонесат за поголема демократизација на изборниот процес, јакнење на законодавната контрола врз извршната власт, како и за демонтажа на „еднопартискиот систем“ на владеење.
„Во процесот на носење круцијални одлуки ќе бидат вклучени повеќе политички субјекти, а со тоа ќе се зголеми одговорноста на институциите пред граѓаните“, се наведува во соопштението од Демократскиот сојуз.
Партијата предлага да се задржи пропорционалниот модел, без изборен праг, а распределбата на мандатите да се врши според Донтовиот модел. Една изборна единица, велат од ДС, ќе обезбеди еднаква вредност на гласот, за разлика од сегашниот модел, каде што бројот на гласови потребни за избор на пратеник значително се разликува по изборни единици.
„Во шестата изборна единица еден пратеник се избира со 6.300 гласа, а во третата со 10.000 гласа. Со предлогот, секој пратеник ќе има речиси ист број на гласачи зад себе“, нагласуваат од ДС.
Дополнително, се предлага овозможување на самостоен настап на партии од помалите етнички заедници, кои – доколку добијат доволна поддршка – ќе добијат свое место во Парламентот.
Во однос на отворените листи, Демократскиот сојуз смета дека таа реформа сè уште не е доволно истражена. Затоа предлага пилот-проект: отворени листи на локалните избори, но само во неколку општини – Центар, Струга и Гевгелија.
Покрај тоа, партијата предлага предлог-законот да се надополни со препораките на ОБСЕ и ОДИХР.
Од Демократскиот сојуз потсетуваат дека веќе 15 години се залагаат за вакви изборни реформи, кои, според нив, уживаат широка поддршка кај граѓаните, но досега биле блокирани со, како што велат, „флоскулата за општ политички консензус“.
„Последниот обид за воведување на една изборна единица беше во 2022 година, но беше блокиран од СДСМ и ДУИ“, се додава во соопштението.
