Летото се очекува да биде значително потопло и посушно од просечните вредности измерени во изминатите години. Во државата постои голема веројатност температурата да надмине повеќегодишен просек за околу 3°C речиси на целата територија. Најизразено зголемување на температурите се предвидува во јули.
Според анализите на Управата за хидрометеоролошки работи (УХМР), летните температури во југоисточниот регион на Европа ќе бидат надпросечни.
Несигурноста кај предвидувањата за врнежите е поголема отколку кај температурата. Се очекува врнежите во целиот југоисточен регион да бидат под просекот, а во Северна Македонија најголемо намалување на количината на врнежи се предвидува во јули. Сепак, во планинските подрачја постои голема веројатност за надминување на просечните врнежи поради појава на засилена конвекција и локално обилни врнежи, стои во соопштението од УХМР.
Многугодишниот просек за температурата на воздухот во летниот период (1991-2020) изнесува околу 16°C во планинските предели и до 26.1°C во Гевгелија. Просечните врнежи во летото најмногу се јавуваат во источниот дел на земјата, каде достигнуваат околу 170 милиметри.
Во Скопје, согласно многугодишниот просек, температурите за јуни, јули и август изнесуваат 22.2°C, 24.7°C и 24.6°C, додека просечната количина на врнежи во истиот период е 47.6, 34.1 и 37.4 милиметри.
Од УХМР предупредуваат дека ова лето може да се појават периоди со екстремно топло и суво време, како и изразени негативни отстапувања од вообичаените температурни вредности. Сепак, ќе има и влажни периоди, поради што временските услови можат да варираат и не се лесно предвидливи со подолг временски период. Затоа се препорачува редовно следење и ажурирање на прогнозите.
