Повторно еруптираше Етна: Туристите панично бегаат [ВИДЕО]

Највисокиот активен вулкан во Европа, Етна на Сицилија, повторно еруптираше, предизвикувајќи паника меѓу туристите кои беа принудени да бегаат за да ги спасат животите. Сцените на евакуација и зголемена активност на теренот повторно го свртеа вниманието кон овој постојано активен вулкан.

Италијанскиот Национален институт за геофизика и вулканологија соопшти дека активноста која била забележана во утринскиот извештај објавен во 4:14 часот и продолжила да се засилува, со „експлозии сè поинтензивни, кои во моментов се многу силни и речиси непрекинати“.

Според податоците на специјализираниот портал VolcanoDiscovery.com, пред ерупцијата била регистрирана засилена сеизмичка активност во форма на вулкански тремор. Треморот започнал околу 22 часот вечерта, а го достигнал својот врв нешто по 1 часот по полноќ. Епицентарот бил локализиран на околу 2,8 километри под главниот кратер на вулканот.

За среќа, засега нема информации за повредени лица, но италијанските власти внимателно ја следат состојбата и издаваат предупредувања за евентуална ескалација на вулканската активност.

Издадено предупредување за пилоти

Како мерка на претпазливост, веднаш по ерупцијата беше издадено „црвено“ предупредување за пилотите – највисокото ниво на тревога кога станува збор за безбедноста на авионскиот сообраќај во близина на активен вулкан.

Три часа подоцна, тревогата беше намалена на „портокалово“ ниво, што и понатаму останува на сила, додека експертите го набљудуваат развојот на вулканската активност со зголемено внимание.

Етна, кој се наоѓа на источниот брег на Сицилија, редовно испушта пепел, лава и гасови, претставувајќи предизвик за локалните жители, туристите и аеронаутичките служби.

#ITALY: New video shows Mount #Etna erupting. pic.twitter.com/zqZHU4FR03

— GRX (@GlobalReportX) June 2, 2025