Москва доставила т.н. „меморандум за мир“ до Киев, во кој поставува серија барања што се оценуваат како ултимативни и еднострани, јавува руската државна медиумска агенција RT. Содржината на документот, кој RT тврди дека го добила, сугерира дека Русија поставува строги услови за прекин на конфликтот, вклучително:
Меѓународно признавање на Крим, Донбас, Херсон и Запорожје како делови од Руската Федерација
Обврска Украина никогаш да не пристапи кон НАТО или друга воена алијанса
Одржување на избори
Повлекување на украинските трупи од т.н. „нови руски територии“
Забрана на „нацистичка пропаганда“
Укинување на воената состојба
Давање официјален статус на рускиот јазик
Овие барања доаѓаат во време кога дипломатските напори за прекин на војната се во ќорсокак, а Западот, особено земјите од НАТО, го поддржуваат Киев со оружје и логистика. Од украинска страна засега нема официјална реакција на овој „меморандум“, но претходните ставови на украинското раководство укажуваат дека се малку веројатни отстапки од територијалниот суверенитет и ориентацијата кон евроатлантските структури.
Со оглед на содржината, аналитичарите веќе го оценуваат овој документ повеќе како медиумска офанзива отколку како сериозна основа за преговори. На теренот, засега нема знаци за деескалација.
