Свет

Велика Британија ја проширува својата нуклеарна флота и преминува во „борбена готовност“

Велика Британија ја зајакнува својата нуклеарна флота како дел од новиот одбранбен план, со цел да се подготви за современите воени предизвици и да се спротивстави на растечката закана од Русија.

Премиерот Кир Стармер, заедно со други европски лидери, интензивно работи на обновување на британските воени капацитети, поради стравувањата од ескалација со Русија. Ова следува откако американскиот претседател Доналд Трамп го повика европскиот континент да преземе поголема одговорност за сопствената безбедност.

„Стратешкиот одбранбен преглед“ предвидува премин на британските вооружени сили во состојба на „борбена готовност“, со цел да се запре долгорочното намалување на воениот капацитет по завршувањето на Студената војна.

„Дојде време да го трансформираме нашиот пристап кон одбраната“, изјави Стармер при посетата на бродоградилиштето Гован на компанијата BAE Systems во Шкотска, додавајќи дека ќе запре „празнењето на нашите вооружени сили“.

„Кога сме соочени со директни закани од држави со напредни воени сили, најдобриот начин да ги одвратиме е да бидеме подготвени“, потенцираше тој.

И покрај намалувањето на буџетот за одбрана во последните години, Велика Британија останува една од водечките воени сили во Европа, со армија која го штити источниот дел на НАТО и морнарица која ја одржува својата присутност во Индо-Пацификот.

Сепак, со 70.860 професионални војници, британската армија е најмалата од времето на Наполеон, а Владата смета дека е неопходно нејзино обновување во екот на зголемените стратешки закани.

Откако беше избран во јули минатата година, Стармер веќе намали дел од буџетот за социјална помош за да го зголеми издвојувањето за одбрана на 2,5% од бруто домашниот производ (БДП) до 2027 година, од сегашни 2,3%, со долгорочна цел од три проценти.

Премиерот го претставува зголемувањето на одбранбените трошоци како можност за создавање работни места и економски развој, при тоа балансирајќи со тешката состојба на јавните финансии, бавниот економски раст и падот на популарноста меѓу гласачите.

Авторите на планот, меѓу кои поранешниот генерален секретар на НАТО, Џорџ Робертсон, и поранешната советничка во Белата куќа за Русија, Фиона Хил, наведуваат дека зголемената финансиска поддршка им овозможила да создадат децениски воен план.

Од 62 препораки што Владата ќе ги прифати, Велика Британија ќе изгради најмалку шест нови фабрики за муниција, ќе набави до 7.000 парчиња оружје со долг дострел од британско производство и ќе развие нови комуникациски системи за бојното поле.

Во рамките на модернизацијата, Велика Британија ќе развие до 12 нови нуклеарно-енергетски подморници од следната генерација, опремени со конвенционално оружје.

Првпат е дефинирана и цената за замена на нуклеарните боеви глави на посебната флота подморници, со проценет трошок од 15 милијарди фунти (околу 17,8 милијарди евра) пред следните избори во 2029 година.

„Со новите, наjсовремени подморници што ќе патролираат по меѓународните води и нашиот сопствен програм за нуклеарни боеви глави, ја правиме Британија безбедна дома и силна на меѓународната сцена“, изјави министерот за одбрана Џон Хили.

Овој обемен план за зајакнувањето на одбранбените капацитети ја поставува Велика Британија во позиција на поголема воена спремност и влијание во услови на зголемени геополитички тензии.

Свет

Јужноафриканци принудно на фронтот во Донбас: „Не разбравме што потпишуваме“

Јужноафрикански мажи, меѓу кои и постариот брат на Бонгани од покраината Квазулу-Натал, завршиле на фронтот во Донбас, тврди семејството, откако биле регрутирани под лажни ветувања за обука како телохранители.

„Тие немаат воена обука и никогаш не виделе војна. Беше им кажано дека ќе добијат работа за да ги прехранат семејствата, но се најдоа на бојното поле“, изјави Бонгани, чие име е променето за безбедност.

Според сведоштвата, јужноафриканските мажи отпатувале во Русија преку Дубаи, потпишале договори на руски јазик без можност за превод и веднаш биле испратени во Украина. „Проблемите започнаа кога ги префрлија од Русија во Украина и рекоа дека тоа е обука, а потоа ни рекоа дека сме под команда на руската армија“, раскажува Бонгани.

„Скај њуз“ добил пристап до видео пораки од мажи кои тврдат дека биле принудени на борба, а една од нивните контакти била Дудузиле Зума-Самбудла, ќерката на поранешниот јужноафрикански претседател Џејкоб Зума, која ги убедила да потпишат.

Во Јоханесбург, пет лица биле уапсени по пријава дека патувале во Русија преку ОАЕ, меѓу нив и 21-годишник и 39-годишна Патриша Мантуала, обвинета за регрутирање. Судот им одобри кауција, а полицијата не ја исклучува можноста за повеќе апсења.

Семејствата на заробените мажи се обидуваат да ги вратат дома, и покрај опасностите и неизвесноста што ја носи конфликтот. „Никој не е безбеден и никогаш не знаеме што може да ни се случи следно“, вели Бонгани.

Свет

Полскиот претседател: Зеленски недоволно ја цени помошта на Полска за Украина

Полскиот претседател Карол Навроцки денеска во Варшава изнесе критики кон украинскиот лидер Володимир Зеленски, тврдејќи дека Украина не ја цени доволно поддршката што Полска ѝ ја дава во конфликтот со Русија.

Навроцки истакна дека Полска од почетокот на руската инвазија во 2022 година прифатила повеќе од еден милион украински бегалци и е еден од главните добавувачи на оружје и хуманитарна помош за Украина. „Полјаците сметаат дека нашите напори и помошта за Украина не се доволно ценети или разбрани“, рече тој, додавајќи дека ова му го пренел на Зеленски во „решителен и искрен, но и срдечен разговор“.

Зеленски од своја страна нагласи дека Украина отсекогаш била благодарна за полската помош и ќе продолжи да ја цени, посочувајќи дека Украина ја брани Европа од руската агресија по висока човечка цена.

Свет

Американски разузнавачи: Путин сака целосна контрола над Украина и пошироки територии во Европа

Американските разузнавачки служби предупредија дека рускиот претседател Владимир Путин има намера да ја окупира целата Украина и да ја прошири контролата над делови од Европа што некогаш припаѓале на Советскиот Сојуз, и покрај тековните мировни преговори.

Украинската разузнавачка служба, предводена од генерал-потполковникот Кирило Буданов, исто така оцени дека Русија продолжува да има амбиции за проширување на територијата.

Според шест извори запознаени со податоците на американската разузнавачка служба, воените цели на Путин остануваат непроменети, што е спротивно на изјавите на американскиот претседател Доналд Трамп и неговите преговарачи дека Путин бара крај на конфликтот. Европските лидери, како и американските експерти, веруваат дека Путин има намера да контролира целата Украина и територии од поранешниот Советски Сојуз, вклучително и некои членки на НАТО.

„Разузнавањето отсекогаш велеше дека Путин сака повеќе“, изјави Мајк Кугли, демократски член на Комитетот за разузнавање на Претставничкиот дом. „Европјаните се убедени во тоа. Полјаците се апсолутно убедени, а балтичките земји мислат дека се првите кои го знаеле тоа.“

Во моментов, Русија контролира околу 20% од украинската територија, вклучувајќи ги анектираните покраини Луганск, Донецк, Запорожје, Херсон и Крим. Трамп, како дел од предложениот мировен договор, врши притисок врз Киев да повлече дел од своите сили од мал дел од Донецк, што Зеленски и мнозинството Украинци категорично го отфрлаат.

Иако Белата куќа најавува „огромен напредок“ во мировните преговори, Путин на својата годишна прес-конференција не понуди компромиси и нагласи дека неговите услови мора да бидат исполнети. Според официјални податоци, руските сили напредувале за околу 6.000 квадратни километри оваа година.

Американски официјални лица, меѓу кои и државниот секретар Марко Рубио, признаваат дека е неизвесно дали Путин навистина сака мировен договор или неговата цел е целосна контрола над Украина.