Нападот со украински дронови ја разниша безбедносната доктрина на Русија
Големиот украински напад со беспилотни летала врз неколку руски воздухопловни бази сè уште одекнува во Москва, која е под сè поголем притисок да одговори на ескалацијата. Според украинските власти, во нападот биле уништени најмалку 13 руски авиони, а дополнително биле оштетени и бомбардери со можност за носење нуклеарно оружје.
Како што известува дописникот на Sky News од Москва, Ивор Бенет, повици за нуклеарен одговор кон Украина веќе се појавуваат во руските државни медиуми и на социјалните мрежи.
„Некои гласови тврдат дека, според руската нуклеарна доктрина, овој напад може да се смета за доволно оправдување за нуклеарна реакција, бидејќи цел на нападот биле авиони со нуклеарен капацитет“, пренесе Бенет.
Од друга страна, прорежимските воени блогери остро ја критикуваа руската воена команда, обвинувајќи ја за сериозна немарност. Фокусот на критиката е тоа што авионите биле оставени на отворено, без адекватна заштита, иако се наоѓале стотици километри од украинската граница.
„Се сметаше дека тие аеродроми се безбедни само поради географската оддалеченост од фронтот“, додава Бенет. „Сега се зборува и за можни кадровски смени во воениот врв.“
Иако Кремљ сè уште нема официјален став за можното противдејство, аналитичари предупредуваат дека рускиот одговор е неизбежен – дали ќе биде војна реакција, дипломатска пресметка или комбинација од двете, останува да се види.
Она што е извесно, велат набљудувачите, е дека нападот сериозно го разниша чувството на безбедност на руските стратешки сили, длабоко во внатрешноста на земјата.
