Антикорупциската платформа „Вреди“ излезе со сериозни обвинувања за корупција, непотизам и злоупотреба на јавни средства во Град Скопје, посочувајќи директна вмешаност на градоначалничката Данела Арсовска, функционери од ДУИ и Левица. На прес-конференција беа презентирани конкретни документи за сомнителни договори склучени од ЈП „Комунална хигиена – Скопје“ со блиски лица на политичари и директори.
Според наводите, претпријатието на 25 февруари 2025 година склучило договор вреден 775.000 денари (близу 12.000 евра) со фирмата „Веда ДООЕЛ“, чии приматели на парите се Валон Беџети, осумнаесетгодишен син на градоначалникот на Сарај, Блерим Беџети. Договорот е за наводни „интелектуални услуги – совети за заштита на животната средина“, без јасни резултати или извештаи за завршена работа.
„Парите на скопјани завршуваат во сметките на фамилијата Беџети, додека градот тоне во ѓубре и нечистотија“, велат од „Вреди“.
Истовремено, јавноста беше информирана и за втор случај со идентична фактура и сума, исплатена на друго лице – Бесар Саќипи, блискиот роднина на в.д. директорот на ЈП „Комунална хигиена“, Сабахедин Рустеми, кој според обвинувањата, е поставен од Арсовска во координација со ДУИ.
„Во еден ден – две фактури, две исплати по 775.000 денари, иста шема, различни роднини“, изјавија од „Вреди“, посочувајќи дека вкупната штета изнесува 1.550.000 денари – износ кој, според нив, би можел да покрие годишен буџет за контејнери во неколку скопски населби.
Организацијата повика на итна реакција од Јавното обвинителство, Државната комисија за спречување на корупција и МВР, барајќи истрага за злоупотреба на службена положба, перење пари и судир на интереси. Исто така, од Градот Скопје побараа раскинување на договорот, разрешување на директорот и свикување на вонредна седница на Советот.
„Градоначалничке Арсовска, или ќе ги разрешите и ќе поддржите истрага, или ќе останете соучесник во оваа кражба од џебот на скопјани“, порачаа од „Вреди“, најавувајќи дека секој ден ќе објавуваат нови докази за корупцијата, фиктивните фактури и партиските вработувања поврзани со, како што велат, „коалицијата на корупција и омраза“.
