Туристички бум во Албанија: Раст кој ја загрозува природата и локалните заедници
Албанија – некогаш скриениот бисер на Балканот – денес се соочува со туристички бум каков што досега не е забележан во земјата. Она што до неодамна беше недоволно откриена дестинација, сега прераснува во едно од најбрзо растечките туристички жаришта во светот. Но, растот доаѓа со висока цена.
Раст од милиони – со последици
Од 2015 година до денес, бројот на туристи во Албанија речиси се утројува – од 3 милиони тогаш на 10 милиони во 2023 година, што претставува раст од 56% во однос на периодот пред пандемијата. Владата амбициозно предвидува 30 милиони туристи годишно до 2030 година, што би ја позиционирало пред туристички велесили како Португалија и Хрватска, пренесува британскиот Express.
Но, со рекордниот прилив на туристи, доаѓаат и алармантни предупредувања.
Без план – со штети
Урбанистички хаос, неконтролирана изградба и уништување на природата – ова се дел од заканите кои ги идентификуваат локални активисти и експерти. Уесли Дидани од порталот Saranda Web вели дека на повеќе локации, особено во Саранда, се реализираат градежни проекти без никакво планирање, при што се фрла градежен шут директно во морето.
Цени кои ги истиснуваат локалците
Покрај еколошките проблеми, растот на туризмот сериозно го нарушува и балансот на локалните заедници. Цените на недвижностите драматично пораснаа поради странски инвестиции и туристичка побарувачка, оставајќи ги локалците без пристапно домување – слично на кризата во популарни дестинации како Мајорка.
Инфлуенсери, милијардери и луксузни проекти
Албанија станува нов магнет за инфлуенсери и глобални туристи привлечени од природните убавини – од песочните плажи до Синото око, жичарницата Дајти Експрес и археолошкиот парк Бутринт.
Во меѓувреме, меѓу големите инвеститори се најдоа и Џаред Кушнер и Иванка Трамп, кои добија зелено светло за изградба на луксузен хотел вреден 1,4 милијарди долари на островот Сазан.
Трета во светот по раст
Според податоци од Светскиот туристички совет, Албанија моментално е трет најбрзо растечки туристички пазар во светот, зад само Катар и Порторико.
